Saitual District Implementation Demand Committee pawhin Saitual District tipuitling thuai tura sorkar nawr nan naktuk, Independence Day champha lo thleng turah zing dar 5 atanga tlai dar 5 thleng, an khaw pum huapin total bandh an huaihawt dawn. Hemi chungchanga hriattirna hi Saitual District Implementation Demand Committee chuan vawiin khan a chhuah a, Aizawl lam kawtchhuahah te, Champhai lam kawtchhuahah te, Phullen panna kawngah te leh an khaw chhung hmun hrang hrangah mihring leh motor an dang dawn a ni. Saitual SDO (Civil), Pu R. Vanlalsawma chuan kum danga tih dan pangngaiin Saitual khelmualah Independence Day lawmna tur ruahmanin pandal-te pawh a chei zo vek tawh tih a sawi a, thuchhuah siamin sorkar hnathawk zawng zawng leh mipuite chu Independence Day lawmnaa tel vek turin a ngen a ni. Saitual Sub Divisional Hqrs.-a Independence Day lawmna inkhawma khuallian atan hian Assembly Deputy Speaker, Pu R. Lalrinawma chu beisei a ni. Independence Day champha hi naktukah Saitualah tluang taka lawm a nih theih dan tur chu sorkar lamin a ruahman tawh a, dan leh thupek keng kawh turin Magistrate bakah Police-te pawh duty-tir an ni ang.
