Saitualah Total Bandh huaihawt vangin Independence Day lawm thei lo

0
309
views

Saitual District Implementing Demand Committee-in Saitual leh a chhehvel khuaah vawiin khan Total Bandh an huaihawt avangin Saitual-ah Independence Day lawm theih a ni ta lo a, Saitual khelmual-a he ni lawmna hmanpui tura kal, Assembly Deputy Speaker, Pu R. Lalrinawma chu Saitual District Implementing Demand Committee hruaitute leh Party hruaituten chawhma dar 10 vel khan Saitual khaw daia Khuangthlikawn-ah lo tidingin an boruak awm dan an hrilh a, thil tha lo zawk thleng thei pumpelh nan a lawmna inkhawm buatsaiha hnam puanzar pawt pharh lo tur leh an bandh chu tawn lui lo turin an ngen a. Hei hi Deputy Speaker chuan a remti a, Saitual SDO (Civil) Pu R. Vanlalsawma chu a Quarters kawt-ah he ni lawmna hnam puanzar pawt pharh turin thurawn a pe a, hei hi Saitual mipuiten an hriatin dodal tumin an inpun khawm leh a, buaina chhuak thei tur thlirin SDO (Civil) pawh hian hnam puanzar a pawt pharh ta lo a, vawiin chhun dar 11:40 khan he Bandh hi Saitual District Implementing Demand Committee chuan a titawp ta a ni. Bandh neih chhung hian Saitual, Sihfa, Keifang, Rulchawm leh Ruallung-a sorkar pisa, sorkar in leh dawr zawng zawng khar vek a ni a, khawlaiah mihring leh motor veivak an awm lo a, Phullen kawng, Champhai kawng leh Aizawl kawngte chu dan pin vek a ni a, khaw chhungah pawh hmun tam takah Bandh Duty an awm a ni.