Serchhip Hmar Venga Sports Complex Rs.10,00,00,000/- senga sak hna NBCC-in a thawh mek chu vawiin khan Serchhip Bawrhsap, Pi Sangchhin Chinzahin a tlawh. Bawrhsap hi Serchhip Sub-Headquarters YMA hruaituten an tawiawm a, a hmun an thlenin NBCC Engineer, Pu Mithun Das leh a thawhpuiten an lo dawngsawng a, tun thla chhung hian he Sports Complex khelmuala phullem phah hna zawh hman an tum thu a lo hrilh a,Pavillion-a thutna tur Plastic chair rem dan tih that ngai pawh tihfel tawh a nih thu te, tui paihna tur siamthat ngai lai pawh an siamthat tawh thu a hrilh bawk a ni. He Sports Complex-a phullem phah hi a dung meter 105, a vang meter 65 ni tura ruahman a ni a, he Stadium hi mi 5,000 leng tura duan a ni a, a chhunga Pavillion-ah plastic chair 1,100 daha kilh beh a ni tawh a, a kual chhuakin mipui thutna tur cement concrete-a siam a ni bawk.
