Shillong-a Mizo Kohhran Biak In inchuh chungchangah inremna thu thlung

0
502
views

Shillong-a Mizo Kohhran Biak In, Bomfyle Road, Laitumkhrah-a mi, Zoram Pawn Mizo Kohhran (ZPMK) hnuaia awm thin, Presbyterian Kohhran leh Baptist Kohhranin an inchuh chu inremna thuthlung siama chin fel a ni.

He inremna thuthlung hi nimin khan Baptist Kohhran aiawh leh Presbyterian Kohhran aiawhten Shillong-ah an siam a, hetah hian Baptist Kohhran aiawhin Shillong Mizo Baptist Kohhran Secretary, Upa Lalchhuana Hrahsel-in a hming a ziak a, Shillong Mizo Kohhran aiawhin Upa Lalmalsawma Pachuau-in a hming a ziak a ni. Hemi hma, tun thla ni 1, kar kal ta Zirtawpni khan Baptist Church of Mizoram chuan he Biak In neitu nihna chang tura Court-a thu an lo thehluh tawh chu an hnuk kir a, hemi ni tlaiah vek hian Kohhran pahnih chuan inkhing buai tawh lova inrem an remti a. An inremna chu nawrtu awm avanga siam ni lovin an inkara thu hretu, remna Pathian hriatpuia an thinlung pheka ziak niin an sawi. He inremna thu an thlun hma hian Presbyterian Kohhran chuan Shillong-a Baptist Kohhran indanna turin Fire Brigade hmunah Biak In hmun tur a lei a, an inremna thuthlungah hian hei hi ziah lan a ni a, inremna thuthlung siam tak avang hian Baptist Kohhran hi chawp chilhin an indang nghal dawn lova, Biak In hmun tur an leiah inkhawm theihna Biak In an peih fel hunah chauh an indang ang a, chumi hma zawng chuan tuna an kal dan pangngaiin he Biak In hi an la inhmantawm dawn a ni. An inremna thuthlungah chuan tun hma, kum 43 kal ta atanga inepna leh inrem lohna an lo neih tawh chu remna siama chin fel a nih thu tarlan a ni a, a ching fel tura nikum August ni 6-a Kohhran pahnihten Joint Meeting an neih leh atangin remna siam tura hma lakna a kaltluang chho ta tih tarlan a ni a, Aizawla Presbyterian Church of India, Mizoram hmunpui atang leh Serkawna Baptist Church of Mizoram hmunpui atanga an hruaitute inhawnna leh thahnemngaihna avanga remna hun tha an nei leh thei chu lawmawm an tih thu an sawi bawk. Remna thuthlung siam hnu, nimin tlai khan Kohhran pahnih inkara inremna thuthlung siam a nih lawmna neih hun tur sawi ho a ni a, ruai theha awm ni khamin October ni 14-ah Shillong Mizo Kohhran Biak Inah a lawmna neih a ni ang.