Sorkarin mipuite thawhlawm thawh tura a beisei a nih chuan, lungawi taka an thawh theih nan harsatna tawh dan a tlangpui tal hrilh se tih chu a ngaihdan a nih thu Pu Lalduhoma’n a sawi.

0
31
views

ZPM Legislature Party hruaitu Pu Lalduhoma hian sorkar sum hmuhna hrang hrang enin sum dinhmun a tha nia a lan thu leh Finance changtu Chief Minister Pu Zoramthanga pawh a thla a muang nia a lan thu a lo sawi tawh a, a thusawi chungchang sawifiahna hi Fianance Dept chuan nimin khan a ti chhuak a ni.

Pu Lalduhoma hian hripui avangin Mizoramin sum a thawh chhuah tur leh Central atanga hmun beisei pawh a tlahniam dawn tih a chiang a, chutihlai chuan engmah sawi chian awm si lova, sorkar hnathawkte hlawh cut tumna a lo awm tak avangin, sorkar sum hmuhna hrang hrangte a sawi ta tih a sawi a, CM a tawng chhuak ta leh Finance Department-in thuchhuah siama a thusawi an chhang chu hlawhtlinnaah a ngai tih a sawi.

Finance Department pawhin sum hmuhna a tarlan te chu a dik tlangpui tih an pawmpui tih Pu Lalduhoma hian a sawi a. Diklo deuh nia an sawi awmchhun chu LESDE atanga sum hmuh cheng vbc 21 tih chu April ni 22-a CM thusawi behchhana a sawi chhawn a ni tih a sawi a, a lo sual palh a nih chuan, CM in a sawi sual tihna a ni a ti.

SDRF atanga cheng vbc 23.50 Mizoramin a dawn, Covid-19 dona atana hman tur ni lo anga sawi leh, cheng vbc 7 vel chauh hman theih anga sawi chu chhangletin, Ministry of Home Affairs Office Memorandum April ni 3-a inziak angin a sawi chhawng tih a sawi a. He lehkhaah hian, Covid-19 chu India sorkarin Notified Disaster-a an puan avangin, Covid-19 do nan, advance-in sanction a ni tih a inziak a ni a ti.

Pu Lalduhoma hian SEDP atana Budget-a sum dah cheng vbc 513 pawh hripui laka inven nana hman theih zel turah an ngai tih a sawi a., PM-CARES Fund cheng vbc 3100 pawh insem tur a awm leh mek bawk a ni a ti a. Health Dept-ah cheng vbc 19.57 pek a nih thu te, May ni 7 thlengin hman bang cheng nuai 91 sing 5 an la nei tih te leh CMRF atangin May ni 5 thleng khan hman bang cheng vbc 2 chuang an la nei tih a sawite pawh thudik a ni tih Pu Lalduhoma hian a sawi a. Sorkarin mipuite thawhlawm thawh tura a beisei a nih chuan harsatna tawh mek dan a tlangpui talin hrilh se, lungawi takin an thawh thei ang tih chu a ngaihdan a ni tih a sawi a. Eptu MLA te chuan theihtawpa sorkar tawiawm leh, a kal sual tur ven chu an mawhphurhna a ni tih mipuiten hriatpui se a duh tih a sawi.