September ni 3 a\anga ni 9 chhunga Australia-a Commonwealth Weightlifting Championship neih zawh taka India aiawha Gold leh Silver Medal latu, Jeremy Lalrinnunga leh Zakhuma chu vawiin khan Sports Minister, Pu Zodintluanga’n lawmpuina a hlan a. Hemi puala inkhawm tawi, Sports Minister Pisa-a neih hi Sports Secretary, Pu H.L. Rochungnunga’n a kaihruai a, Sports and Youth Department, Mizoram State Sports Council leh Weightlifting Association hruaitute an tel a ni. Jeremy Lalrinnunga hian Commonwealth Youth, Junior & Senior Weightlifting Championship, 2017-ah 56kg Men-ah Gold Medal a dawng a, Zakhuma pawhin 56kg Men-ah tho Silver Medal a dawng bawk. Vawiina anmahni lawmpuinaah hian Jeremy Lalrinnunga’n he infiamna an hmachhawn dan a sawifiah a, a \hianpa Zakhuma chu state pawnah tih tur sang a neih avangin a tel ve thei lo a ni.
