Assembly Session ah zawhna chhangin Pu Robert-a hian Mizoramah football khelh uar ber a ni a, phullem phah a nih loh chuan furtui tlak tamna a nih avangin khelmualte pawn lam mite pawm tlak qualified ground a ni thei lo a, hei vang hian football khelmualah te a theih anga tam phullem phah tum a ni a, Externally Aided Project hnuaiah ram pawn lam a\anga sum puk tur dap a ni a ti. Tun dinhmuna sorkarin phullem phah a tumna te pawh Pu Robert-a hian house a hrilh a, chungte chu Muallungthu, Chite Veng, Tuivamit, Durtlang, Zemabawk, Hlimen, 1st MAP Ground Armed Veng, Edenthar Field Aizawl, Mitla Mual Zemabawk, Lengpui, Saidan Kolasib, Khawzawl Mualvawm Field, Saitual, Hnahthial, Siaha leh Thingsen khelmualte a ni tih a sawi.
Sports Minister hian Thenzawl leh Kawnpuiah te football ground atan phul lem phahna tur sum a awm rih loh avangin pha a la ni dawn rih lo tih a sawi bawk a, SAI Centre chu Mizo infiammi hlawhtling tak tak chher chhuaktu a nih avangin sorkarin a ngai pawimawh a, Kolasib ah din mek a ni a, Champhaiah pawh SAI Centre nei tura hmalak tum a ni a ti a, State Games chu kum dangah pawh mumal leh fel zawka neih chhunzawm tum a ni a ti bawk.
