Sports & Youth Services Department-in an hnuaia inziak lut, infiamna hrang hrang leh Youth Services-te thisen pek runpui chu Mizoram Scouts & Guides Vice President leh School Education Minister, Pu H Rohluna’n vawiin khan Aizawl Civil Hospital-ah a hawng a, mi thenkhat, ruih theih thil tih avang leh hrisel lohna avanga thisen pe thei lo an awm laia tuna thisen pe theia awmte chu an vanneihzia hre turin a chah. Civil Hospital Medical Superintendent, Dr KL Remsanga pawhin a thlawna thisen petu tam tak awm mah se, damlo, thisen pek ngai an pun ve zel avangin duhthusama indaih a har hle tih a sawi. Sports & Youth Services in thisen pek runpui a buatsaih hi Mizoram pumah bawhzui a ni dawn a, vawiin khan Aizawl District-ah tan a ni a, District hrang hrangin an pek ni tur siam a ni. Vawiina thisen an pek hi unit 200 vel a ni.
