ST-ah Meitei telh phutin vantlang inkhawm buatsaih

0
377
views

Scheduled Tribe zinga Meitei-te telh ph<t mekah, Manipur-a Scheduled Tribe Demand Committee chuan nimin khan Imphal khawpuia Palace Compound-a Ibobyaima Shumang Leela Shanglen-ah vantlang inkhawm an buatsaih a, khawtlang hruaitu 35 leh mi dang eng emaw zatin thu sawiin, Meitei-te chu Tribal zinga telh an ngiat thu an sawi a, state sorkar chu sorkar laipui hnena rawtna thehlut tura nawrin, thehluh theih hun chhung an bituk nghal a ni. STDCM sawi danin, tribal nihna chungchang hi sorkar leh politics inrelbawlna nen a inzawm tlat a, hei vang hian Meitei-te chuan Manipur tribal dik tak an ni tih nemngheh a nih theih nan leh ram danpuiah pawh tribal an nihna anga an dikna leh chanvo humhalh a nih theih nan ST-a chhiar tel an ngiat a ni. STDCM chuan ST zinga Meitei telh an nih chuan ram danpuiin state-a Meitei leh tlang mite a \hen hranna chu a bo tawh dawn nia sawiin, hei hian inlungrualna leh inpumkhatna pawh a thlen dawn niin a sawi a, STDCM hian kum 2012, November ni 30 leh December ni 18 khan state Larsap leh khatih laia CM, Okram Ibobi Singh-a hnenah memorandum an thehlut tawh niin an sawi bawk. Kum 2013 May ni 29 khan Tribal Affairs Ministry chuan STDCM thehluh memorandum hi chhangin, Manipur sorkar chu state chhunga Meitei-te ST-a telh an ni theih nan an dinhmun leh chanchin kimchang inziahna report thehlut turin a ti nia sawi a ni a, hemi hnu kum 2015, June 29 khan hemi chungchang hi state Assembly \hutkhawmah sawi ho a ni a, Pu Ibobi Singh-a chuan mithiamte leh thil hlui zir mite an rawn tur thu sawiin, a \ul dan anga bawhzui a tiam a, amaherawhchu hei hi bawhzui lohin a awm ta reng niin STDCM chuan an sawi a, kumin August thlaa bugdet session hnuhnung berah khan state CM, Pu N Biren Singh-a chuan ST chungchanga thuneitu pawl, Manipur State Commission for Scheduled Tribes hnena thlen a nih tur thu a sawi a, STDCM erawh chuan kum 4 kal ta chhung khan Meitei-te ST zingah telh an nih theih nan an lo bei tawh nia sawiin, thuneituten an bengkhawn loh avangin hma an sawn thei lo niin a sawi a ni.