State dang atanga lo haw khawmte zingah Covid-19 kai hmuh chhuah an awm chhoh zel avangin sorkarin sample tam zawk laboratory-a endik a tum a. Quarantine centre-a an awm hun hmang zo tawh turte pawh chhuak rih lo tura tih an ni.

0
148
views

Tunhnaia State dang atanga Mizorama raw haw, Quarantine centre-a awm mekte zingah naktuka an hun hmang zo tawh tur mi engemawzat an awm a, heng mite hi chhuak rih lo tura tih an ni a, hemi chungchanga Zonet zawhna chhangin Covid-19 Medical Operational Team Chairman Dr ZR Thiamsanga chuan quarantine centre-a awmte chu RT-PCR hmanga an sample endik vek tum a nih avang leh, quarantine-a awm hun pawhsei rawtna te pawh a awm bawk avangin tun dinhmunah chuan chhuak rih lo tura hriattir an ni a ti a, Thawhtanni khian Chief Minister hovin thutlukna siam tum a ni a ti. Naktuk hian MGDA, IMA leh Pvt Hospital neitute chu Dr ZR Thiamsanga ho hian an thukhawm ang a, rawtna an neihte Thawhtanni-a Chief Minister hova thutkhawm neih turah hian chhawp chhuah a ni ang.

Mizoramin Covid-19 kai a hmuh chhuah tharte zingah a tam zawk chu RAT hmanga endiknaah rinhlelh kai lo, non reactive an ni a, hei hian mi tam tak ngaih a ti tha lo a, Sorkar chuan RT-PCR hmanga sample tam zawk endik tur hian hma a la nghal a ni. State Field Laboratory Unit hmalakna in, vawiin pawh khan Aizawl-a Quarantine centre hrang hranga awmte chu sample lak khawm beihpui thlak a ni a, CMO East leh West, ZMC leh MMU hnuaia thawktu Doctor, Nurse, Lab. Technician, Health Worker leh Cold Chain enkawltute bakah thawktu dangte sample la tur hian tirh chhuah an ni.

Sample la tura thawk chhuak, mi 30 te hi team 7-ah an inthen a. Quarantine Facilities hmun hrang hrangah insem darhin sample an la a, an sample lak khawmte hi ZMC lamah RT-PCR test tih tura thawn phei nghal a ni ang.

Mizoram Sorkar chuan, District hrang hranga mite sample, a inchhawk endik dan tur a ruahman tawh a, Aizawl District-a mite chu kar tin Thawhlehni, Nilaini, Ningani leh Pathianni-ah endik thin a ni dawn a. Kolasib chu Thawhtan, Nilai, leh Inrinni-ah Saitual chu Thawhtan leh Ningani-ah, Siaha chu Ningani leh Pathianni-ah, Champhai chu Thawhlehni leh Zirtawpni-ah, Mamit chu Thawhlehni leh Inrinni-ah, Lunglei chu Thawhtan leh Zirtawp-ah, Lawngtlai chu Thawhtan leh Ningani-ah, Khawzawl chu Thawhlehni leh Zirtawp-ah, Serchhip chu Nilaini leh Inrinni-ah, Hnahthial District chu Nilaini leh Pathianni-ah endik thin a ni ang.

State dang atanga lo haw hlim, Mizoram luhka-a a nawlpuia RAT hmanga lo endik thin chu tihtawp lailawk ni mahse, Airport-a lo thleng tharte erawh RAT hmanga endik chhunzawm zel an la ni.