Subroto Cup Football Tournament, 2019 hi August ni 21 atanga August ni 29 inkar khan New Delhi ah khelh a ni a. Mizoram aiawhtu Saidan Secondary School, Kolasib hian an khingpui te hneh vekin Final-ah nikum Subroto Cup Football Tournament semi final a an hneh loh, champion lai Unique Model Academy of Manipur chu si hnih faia hnehin an champion a. Tournament chhung hian Mizoram Team hian goal 44 an thun a, goal thum an chhuah a, Champion lawmman Rs. 3,00,000 an dawn bakah Mizoram player Romalsawma chu Best Player ah thlan a ni a, Rs. 50,000 a dawng a ni. Mizoram Team Coach Lalbulliana chu Best Coach ah thlan a ni bawk a, Mizoram Team hian Best School lawmman an la tel bawk a ni.
Aizawl Press Club-a buatsaih Mizoram team te chawimawina inkhawm hi hi Sports & Youth Services Director Pu Zothanmawia’n a kaihruai a, Sport Minister Pu Robert Romawia Royte in hmanpuiin, Subroto Cup Under-14 champion team te chu Sports & Youth Services Department enkawl Regional Sports Training Centre Football Academy, Saidan Kolasib-a training an nih avangin sorkar hmalakna tihlawhtlingtu chhuanawm tak an ni, a ti a. Regional Sports Training Centre, Saidan Kolasib chu ti changtlungin Sports Authority of India Centre ah puan a nih tawh thu a sawi a. Reilote ah Centre sak \an tum a ni a ti.
