Thuthar lakhawmtu \henkhat zawhna chhangin Addl. CEO, Pi Lalzarmawii chuan, candidate zinga thubuai neiten chanchinbu leh TV-a an thubuai neih thu an tarlan chu inthlan zawh a\anga ni 30 chhungin CEO Office-ah chanchinbua an chhuahna copy nen an thehlut vek tur a ni tih a nih thu a sawi a, hetiang thubuai neite chu he thupek hi zawm vek tura beisei an nih thu leh zawm lote chu dan anga hrem an nih tur thu a sawi a ni.
Supreme Court thupek ang chuan, candidate zinga thubuai neite chuan an dinna biala chanchinbu darh zau berah thubuai an neih thu hi vawi 3 an puang tur a ni a, hetiang bawk hian Cable TV darhzau berah second 7 aia tawi lo thubuai an neih thu tarlanna an chhuah tur a ni a. Hei bakah hian an awmna Political party ten Mizoram chhunga chanchinbu darh zau berah an candidate-in thubuai an neih thu hi \um 3 an tarlang tur a ni bawk a ni.
Supreme Court thupek an bawhzui dan zawhna chhangin Aizawl District Election Officer, Dr. A. Muthamma chuan, candidate zinga thubuai neiten tualchhung chanchinbu darhzau zuala an thubuai neih dan an tarlan dan tur chungchangah Information and Public Relations Department chu chanchinbu leh TV darhzau-te hming pe tura an ngen angin, chanchinbu 28 – Vanglaini, The Aizawl Post, The Zozam Times, Mizo aw, Tawrhbawm, Highlander, Newslink, Chhawrpal, Romei, Dingdi, Mizo Arsi, Lenlaini, Zoram Tlangau, Youth Herald, Entlang, Hnehtu, Aizawl Observer, Zawlbuk, Virthli, Zalen, Zawlkhawpui, Thlirtu, Sakeibaknei, Khawpui Aw, Mizo Express, Zoram Voice, Zorin leh Lentlang an ni a, hei bakah hian TV station 3 – Doordarshan Kendra Aizawl, LPS Vision leh Zonet Cable TV te chu TV station lian zual an ni tih an dawng niin a sawi a, candidate thubuai neite chuan heng zinga engemaw berah hian thubuai an neih thu \um 3 tal an tarlan a ngai dawn niin a sawi a ni.
Association for Democratic Reforms chuan nimin khan Aizawl Press Club-ah thuthar thehdarhtute kawmin, Mizoram inthlanpui neih tura candidate mi 209 an zirchianna a\angin mi 8-in thubuai an nei tih hmuhchhuah a nih thu an sawi a, chung mite chu South Tuipui biala MNF candidate, Dr. R. Lalthangliana eiruk kaihhnawih thubuai, Tuichang biala Congress candidate, Pu James Thanghmingmawia mi tihhmingchhiat thubuai, Serchhip leh Champhai South-a Congress candidate, MPCC President nibawk, Pu Lal Thanhawla inthlan kaihhnawih thubuai, Tuichang biala BJP candidate, Pi Lalduhpuii ruihhlo kaihhnawih thubuai, Tuichawng biala MNF candidate, Pu RM Chakma Document lem siam leh a huhvoa pawi khawih thubuai, East Tuipui biala BJP candidate, Pu VL Zahawma mi bum thubuai, Lunglei North-a independent candidate, Pu V Malsawmtluanga lirthei khalh fimkhur loh vanga thihna thleng thubuai leh MNF President, Aizawl East-I biala MNF candidate Pu Zoramthanga eirua puhna thubuai leh inphiarrûkna thubuaite a ni. MNF President, Pu Zoramthanga chu thubuai pahnih nei awm chhun a ni.
