Thal kap thiam Pu C. Lalremsanga’n Dhyan Chand Award a dawn chu nimin khan Art & Culture Auditorium Berawtlang-ah lawm a ni a, a hmanpuitu Chief Minister Pu Zoramthanga chuan India hmarchhak state a\anga Dhyan Chand Award dawng hmasa ber Mizoramin a nei chu lawmawm a tih thu a sawi a, a tumruhna leh a beih nasat zia atangin mipuiin zir tur an nei a ni, a ti.

Pu C. Lalremsanga chuan infiamna khawvela bul a tan dan leh national leh international level intihsiaknaa a tel chhoh dan te sawiin, hlawhtlinna a chan chu tumruhna leh tawngtaina rah liau liau a nih thu a sawi. Pu C. Lalremsanga hi kum 1992-2002 chhung khan India aiawhin intihsiakna hrang hrangah telin India tan lawmman engemawzat a lo la tawh a. Kum 1992 Barcelona Olympics leh kum 1996 a Atlanta Olympics ah India aiawhin a tel bakah 1994 a Hiroshima a Asian Games ah leh World Championship panga ah a lo tel tawh bawk a. Hemi bakah hian khawvel pum huap intihsiakna engemawzat ah telin, kum 1995 a Delhi a Commonwealth Championship buatsaihah khan team event ah Gold lain, mimal intihsiaknaah Bronze a lo la tawh bawk a ni. Dhyan Chand Award for Lifetime Achievement in Sports and Games hi Dhyan Chand Award tia kaihtawi a ni a, India rama infiammi, an vanglaia hnuhma nei \ha te chawimawina a ni a.

Pu C. Lalremsanga Award dawn lamna inkhawmah hian Sports & Youth Services Director Pu Zothanmawia leh United Sport Association of Mizoram Sr. Vice President Pu Vanlalsawma te pawh in thu an sawi a ni.