Thawhtanni atanga inkharkhipna dan thar hman a nih hnuah dan bawhchhia man engemawzat an awm tawh a, Aizawlah chuan nimin khan dan bawhchhia mi 224 man an ni.

0
353
views

Police hotute hnen atanga Zonet thudawn danin, Sorkar laipuiin inkharkhip thawh 3-na atana dan a siam zulzuia Mizoram sorkar-in mipui khuahkhirhna a duan chu khauh taka kenkawh a ni a. Dan thar hmang hian khawlaia chhuak hmai tuamna hmang lote, vantlang hmuna chil chak leh Social Distancing zawm tha lote chu man-in pawisa chawi tir an ni a, nimin ringawt khan Aizawlah dan bawhchhia mi 224 man an ni. Police hotute chuan, Thawhtanni pawh khan dan bawhchhia hi man an nei nual tih an sawi. Hetiang bawk hian Traffic Police-te pawhin lirthei, an tlan chhuah loh ni-a tlan an man nual a. Traffic hotute chuan, lirthei tlan loh huna tlante sum chawi tur chu a tam tham deuh avang leh dan bawhchhia zinga a tam zawk chu sorkar thupek hre lo leh thupek nihphung hrethiam lo an nih avangin ngaihhnathiam chin an nei a, sum chawi tir hi mi 2 an awm tih an sawi.

Mizoram Sorkar-in inkharkhip thawh 3-na inkaihhruaina a siam ang chuan hmai tuamna vuah lo chu Rs.100, social distancing zawm lo chu Rs. 200 leh vantlang hmuna chil chhak chu Rs. 300 chawi tir theih an ni a. Thuneitute phalna lova Covid-19 kai leh rinhlelhte nihna pholang thei thehdarh chu thla 3 lungin tantir leh Rs. 5,000 chawitir theih an ni a, Phalna nei lova sakhua leh vantlang thila punkhawm huaihawttute leh ramri kan te chu Rs. 5,000 chawi tir theih an nih bakah Quarantine emaw isolation emaw pumpelh tumte chu Rs. 3,000 thleng chawi tir theih an ni a, a hun hmaa quarantine emaw isolation emaw chhuahsan luite chu Rs. 1,000 aia tlem lo, Rs. 5,000 thleng chawi tir theih an ni a, Quarantine-a awm zinga inkaihhruaina zawm lo chu Rs. 500 chawi tir theih an ni a, Central leh State sorkarin Covid-19 dona tura inkaihhruaina a siam leh mipui kharkhipna thupek a siam zawm duh lo chu Rs. 1,000 chawi tir theih an ni.