Mizoram Sorkar-in khauh zawka inkharkhip kalpui tura thupek a chhuah leh hemi zulzuia Serchhip District Bawrhsap-in inkharkhipna tur inkaihhruaina a siam chu Thenzawl Town Task Force Committee on Covid-19 hian vawiin khan an thlir hova, sorkar ruahman angin hapta hnih chhung inkharkhip hi kalpui ni se, hetih chhung hian Thenzawl khaw chhunga Dawr leh Retailer te chu ni tin zing dar 6 atanga dar 9 thleng hawn thin ni se, hemi hun chhung hian social distancing vawng chunga mipui ten mamawh lam thin ni se, an ti a. Dawr hawn a nih chhung hian lirthei eng chi pawh chhuah phal a nih bakah, infiammite pawh fimkhur taka an infiam phalsak a ni bawk.
Thenzawlah hian Naktuk atangin YMA Branch hrang hrangte chu an huam chhungah theuh zing atanga zan dar 10 thleng ngawrh taka Duty tan leh tur a ni a, zing lama mamawh lamkhawm hun an siam bak chu mi tumah pawn chhuak lo turin an ngen a ni.
