Thlai chi kui tiahna, Nursery tanpuina mipui chan tur awm lo khawpin an insem zo thin niin sawi

0
433
views

Thlai chi kui tiahna, Nursery tanpuina, sorkar laipui atanga lo kal chu Horticulture Department hotu thenkhatin mipui chan tur awm lo khawpin an insem zo thin niin Nursery neitu thenkhatin an sawi a, he thil hi a rang thei ang berin thuneituten en fel se an duh thu an sawi a. Hun eng emaw chen kal ta atang khan thlai tiak supply-na tur tender chu NLUP hnuaiah bak neih a ni tawh lova, tum hnih khat, Supply Order an hmu tih loh chu Horticulture Department-a Officer thenkhat, Nursery neite leh an thurualpuiten an insem zo vek nia sawiin, hemi chungchangah hian eirukna lian tak a awm ni ngeia an hriat thu leh hetiang thil dik lo hi reh tawh se an duh thu an sawi. Kut hnathawktute tan hian sorkar laipui atangin tanpuina tam tak a lo kal thin a, chung zingah chuan Pipe pakhat takngial pawh a taka thawktuten chan tur an nei ngai lo nia sawiin, Officer zinga Nursery neiten an insem zo zel nia an hriat thu leh, kut hnathawktu, Nursery nei thenkhat phei chu Tender chhang thei lo turin sorkara an inziah luhna (Registration) pawh tihnun (Renew) an phal lova, Registration renew an phal zinga mi pawh Tender chhan an phal lo thin nia sawiin, an thlai tiakte hi sorkar-a supply a nih loh chuan tualchhungah a hralhna tur a awm loh avangin an mangang hle niin an sawi. Nursery neitu chuan, an harsatna tawh mek chungchang hi Thawhtanni khan CM, Pu Lal Thanhawla pawh an lo sawipui tawh niin an sawi bawk.