Tlabung leh a chhehvel khaw hrang hranga VLTF, YMA leh YCA hruaitute chu Lunglei SP Pu Stephen Lalrinawma’n kawmin, ramri a him chhunzawm zel theihna tura tan lak dan tur a sawipui.

0
102
views

Ramri-a a ruka inkalpawh turte venga thawkchhuak mi tlawmngaite inpekna fakawm a tih thu, Pu Stephen Lalrinawma hian sawiin, tha thlah lova theihtawp chhuah chhunzawm zel turin a ngen a, hmun hrang hranga Bangladesh nena inkalpawh theihna te chu khar vek ni mah se, beihpui thlaka ven a tul hun chhung tur sawi lawk theih a ni lo tih a sawi a, tun aia hautak si lo, awmze nei si-a ramri venghim tura ruahmanna siam a tul tih a sawi.

Tuna Bangladesh dinhmun enin, ramri hrula khaw hrang hrangte chu inthlahdah thei dinhmuna an la din loh thu, Pu Stephen Lalrinawma hian sawiin, ramri ven chhunzawm chu thil pawimawh tak nia a hriat thu a sawi a, chutih rualin hun rei zawk ramri venga duty a tul thulhah pawh tan la mar zel thei tura inbuatsaih a tul a ni a ti a, tuna ramri ven hna an thawh dan kalphung chu ennawnna siamthat ngai te chu ruahmanna thara thlak a tula a lan thu a sawi.

Tlabung leh a chhehvel khaw hrang hrang atanga kalkhawm, VLTF leh tlawmngai pawl hruaitute chuan, Lunglei SP-in anmahni ngaipawimawha a tlawh chu lawmawm an tih thu an sawi bakah, a hnenah hian rawtna leh ruahmanna an neih te lo thlenin, harsatna an tawh hrang hrang te pawh tawngkain an lo thlen a, sum leh paia an harsat thu te, hriselna lama harsatna an tawh chungchang an lo thlen te chu a tul angin thuneitu sang zawkte hnena thlenpui a tum thu, Lunglei SP Pu Stephen Lalrinawma chuan a sawi.

Tlabung police station-a CCTV vuah zawh tawh chu vawiina lehlanga Tlabung tlawhtu Pu Stephen Lalrinawma hian hman theih turin a hawng nghal a, Khawthlangtuipui group YMA kutah hma an lak lehzelna tura puih nan tangkafai Rs 30,000 a hlan bawk.