Tlabung kawng siamna atana sum an hmanzat nia GP Project Ltd.-ten an sawi leh an hnathawh dan a inmil lo nia hriain an lakah hian, Tlabunga zirlai pawl pakhatin nikum kum tawp lam khan Anti-Corruption Bureau-ah FIR an thehlut a, ACB-a thawkte chuan thil awmdan chiang leh zuala chhuiin, FIR thehluttute leh sum hmang dik lo nia puh contractor-te pawh thu an lo zawtfiah tawh a ni.
Hemi chungchanga thubuai chingfel tur hian tih tur tam zawk an zawh tawh thu, ACB-a thawktute chuan sawiin, tun dinhmunah PWD assessment an la ngaichang mek tih an sawi. ACB-a thawkte sawi danin, sum hmang dik loa GP Projects Ltd. puh an nihna chhui zawh a nih hnu-ah, an thil hmuh dan te hi ziakin sorkarah an thehlut ang a, chumi hnu-ah Mizoram chief secretary-in thubuai siam tur leh tur loh chungchangah thutlukna a siam dawn a ni.
