Inkawmkhawmna hun kaihruaitu Zodin Farmers’ Society hruaitu Pu Pc Vanlalhnema chuan, an pawl chu sum chang thlai hrang hrang chingtuten hamthatna an dawn ve theihna tur leh, an thawh phu tawk hlawkna an tel theihna tura din a nih thu a sawi a, oil palm chu a chingtuten tun dinhmunah an beisei angin hlawkpui chiah lo mah se, beidawng lova tan la tur leh, tun aia tam tharchhuah tum turin a fuih a ni.
Oil palm chingtu leh a leitu company aiawhte inkawmhonaah hian, Ruchi Soya Industries Ltd. hotute chuan, oil palm an lei dan sawifiahin, market an kalpui dan an sawi zau a, oil palm chingtu kalkhawmte chuan, tun dinhmuna company lamin Rs 5.50-a oil palm kg 1 a leisak baka, Mizoram Sorkar-in cheng 1 a tum ve chu beitham deuha an hriat thu sawiin, Sorkar-in oil palm leina atana a sen chu kg 1 zelah Rs 4.50 tala tihpun an duh thu an sawi a ni.
