Transport Department Jt. Director Pu Zothangzuala Chhangte hnen a\anga Zonet thudawn danin, lirthei endik runpuiah hian lirthei, a bikin lirthei ke hnih nei chite chu lehkha pawimawh neih tur hrang hrang an neih kim leh kim loh endik a ni a, lehkha pawimawh nei kim lote chu a hmunah pawisa chawi tir nghal zel an ni a, pawisa chawi tur nei lote pawh an lirthei lehkha hren sakin, Transport Department Pisa-a thil pawimawhte tifel turin an ti a ni.
Pu Zothangzuala Chhangte chuan, lirthei neitu zingah chhiah chi hrang hrang pek nachang hre lo an awm \hin tih an sawi a, heng lirthei khalhtute hian chetsualna leh vanduaina an tawh palh thulhah harsatna nasa zawk an thawh theih avangin danin a phut anga lirthei lehkha pawimawhte nei kim tur leh chhiah chi hrang hrang pe kim turin an ngen a ni.
Lirthei neitu zinga chhiah pe kim lote tan Transport Department hian, tun thla ni 1 a\anga August ni 31 thleng chhiah pek tlai man chawibelh ngai lova chhiah pek theihna hun an hawng mek a, hei hi lirthei neituten ngai pawimawh a, chhiah pe kim lote chu hemi hun chhunga chhiah pe vek tura ngen an ni tih Dept hotute chuan a sawi.
Enforcement Staff leh Traffic Police te hian Aizawl khawpui chhung hmun pahnih, Chanmari Kawn leh Tuikual South-a Tennis Court bulah te lirtheite hi an endik a, hetah hian lirthei 405 an endik a\angin dan bawhchhia mi 137 an man a. Heng zinga mi 100 chu a hmunah pawisa chawi tir nghalin, an pawisa chawi tlingkhawm hi Rs. 61,800 a tling a. Pawisa chawi tur nei lo, an lehkha pawimawh hrensak mi 37 an awm bawk. Transport Department Jt. Director Pu Zothangzuala Chhangte chuan, a hun leh ni tur sawi lawk theih ni lo mah se, hetianga lirthei endik runpui hi a khat tawka neih chhoh zel an tum tih a sawi a, hei hi lirthei neitute himna tura hmalakna a ni a ti a, mipuite chu dan zawm \heuh turin a ngen a ni.
