Hetiang thutlukna hi Kolasib District NGO Coordination Committee, tukina Sub-Hqrs Office-a \hukhawmin a siam a ni a, he inkhawm hi Sub Hqrs. NGO Coordination Committee Chairman, Pu C. Liankunga, Sub-Hqrs YMA President ni bawkin a kaihhruai a, an thutlukna siam hi ziakin vawiin chhun khan Bawrhsap hi an pe a, a copy chu Mizoram Larsap, Pu Kummanam Rajashekharan, Chief Secretary Pu Arvind Ray leh Chief Electoral Officer-te an pe a ni.
Kolasib NGO hruaitute hian an Bawrhsap, Dr. Arun T, Kolasib District Election Officer ni bawkin dan dik lova Tuikuk Camp-a awm mi 218 Electoral Roll-a a lo thun tawh chungchanga an lungawiloh thu hi tun thla ni 9-a Aizawl tlawha lo zin Deputy Electon Commissioner, Pu Sudeep Jain leh a hote an lo hrilh tawh a, an thu thlen duh hi Central YMA kaihhruai, NGO Coordination Committee hruaitute chuan Election Commission hruaitute an kawmnaah a hrilh a ni.
Zonet zawhna chhangin Kolasib NGO Coordination Committee chuan an Bawrhsap chu a chhuah leh chhuah loh naktuk tlai dar 5 thleng an en phawt dawn niin an sawi a, hemi hnua a chhuah loh chuan an thutlukna siam bawhzui dan an ngaihtuah zui a ni dawn niin an sawi a ni. Dr. Arun T chhuak tura an nawrna chhan chu Tripura Bru Camp-a awmte Mizoram Electoral Roll-a thun chungchangah NGO Coordination Committee hruaitute thudik hrilh lova a thil tih danah zep \hen a neih vang niin an sawi a, a kaihruaina hnuaiah inthlanna dik, felfai, thianghlim, langtlang leh muanawm a awm thei dawn lo niin an sawi a ni.
Puan tawh angin Tripura Camp-a mi 218 thuntharte hi Bawrhsap chuan ERO-Net-ah upload loh angin a sawia, amaherawhchu an hmuhchhuah danin hengte hi thla hlui, October ni 27-ah upload vek a ni tawh a ni. Hemi hmalama Electoral Roll-a inthun diltute hi mi 1,000 vel an ni a, AERO ten hearing an neih laiin an kal loh avangin hnawl vek tawh an ni. Chumi hnu chuan Tripura-a an Camp-ah kal chilhin Appeal hun siam sak leh an ni a, hetah hian inthun dil chu mi 471 niin an zinga mi 218 te hi dan dik lova thun leh tak nia sawi a ni.
Tripura Camp-a Bru awmte Mizoram Electoral Roll-a thun belh an nih vanga mipui lungawilo chuan kar kalta, Thawhlehni zan DC office chu lungin an lo vawm tawh a, zan dar 10 pelh hnuah Mizoram Joint CEO Pu Zorammuana chuan Special Summary Revision 2018-a Bru Camp a\anga Electoral Roll-a in thun thar dilna form lutte chu ennawn leh vek turin Kolasib Bawrhsap hi a hriattir a, a lehkhaah chuan dik lo taka lo thun tawhte chu form 7 hmanga paih leh vek turin a hriattir bakah ennawn lehna chu khawtlang hruaitute leh NGO te awm lai ngeia neih tur tih a hrilh bawk a ni.
