Tripura Bru Relief Camp-a Mizoram Bru awmte kumin September ni 30 hmaa Mizorama let tir leh tum a ni.
Hemi chungchangah hian Union Home Minister, Pu Rajnath Singh, Mizoram Chief Minister, Pu Lal Thanhawla, Tripura, Chief Minister, Biplab Kumar Deb leh Mizoram Bru Displaced People Forum President, Pu A. Sawibunga ten nimin tlai khan New Delhi-ah inbiain thutlukna an siam a, Tripura-a Mizoram Bru awm te laklet lehna tura ruahmanna lo siam tawh, Bru Repatriation Draft Agreement chu chik taka enhova, siam\hat ngai laite siam\hat a nih hnuah Bru te Mizorama laklet leh dan tur chungchangah hian inremna thuthlung siam a ni.
He thuthlungah hian sorkar laipui aiawhin Special Secretary, Internal Security, Pi Rina Mitra leh Mizoram Bru Displaced People’s Forum President, Pu A. Sawibunga te bakah Mizoram sorkar aiawhin Principal Secretary, Home Pu Lalnunmawia Chuaungo leh Tripura sorkar aiawhin Chief Secretary, Pu Sanjeev Ranjan ten an hming an ziak a ni. He inremna thuthlung siam hi Union Home Minister, Pu Rajnath Singh, Mizoram Chief Minister, Pu Lal Thanhawla leh Tripura Chief Minister, Pu Biplab Kumar Deb ten an hriatpui a ni. Tripura Bru Relief Camp-a Mizoram Bru la awm te laklet dan tur chungchang Union Home Minister hova sawihonaah hian Home Ministry-a Joint Secretary,
Intelligence Bureau Director, Mizoram Home Deptt.-a Office on Special Duty, Pu David H. Lalthangliana te pawh an tel a ni.
Puan tawh angin Tripura Bru Relief Camp-a Mizoram Bru dik tak laklet theih te chu kum 2016 November thlaa enfiah angin chhungkaw 5,413-a mi 32,857 an ni a, heng mite hi Mamit District-a khaw 48, Kolasib District-a khaw 10-ah leh Lunglei District-a khaw 4-ah dah tura ruahman a ni. Union Home Minister, Pu Rajnath Singh nen thil pawimawh an sawi dunnaah hian Pu Lal Thanhawla chuan Zokhawthar-a |iau leia Assam Rifles duty ten sumdawngte bungraw phurtu Truck an dang \hin chu titawp thuai turin Union Home Minister a ngen a, Aizawl khawpui chhunga awm Assam Rifles te an insawnna tur Zokhawsanga an insawn thuai theihna tur pawh a sawipui bawk.
