Rorellai MNF party chuan National Core Committee member Pu K Vanlalvena an candidate ah an dah dawn tih an puan chian hnuah vawiin khan Congress in an candidate atan Minister hlui Pu PC Zoram Sangliana an ruat tih hi an ti chiang veleh a. Congress party-a PAC, Adviser leh Congress Legislature party te chu vawiin khan an party pisa pui Congress Bhavan-ah an thukhawm a, chawhnu lam khan an party Candidate tur hi ti chiangin Minister hlui Pu PC Zoram Sangliana hi an ruat a ni.
Pu PC Zoram Sangliana hi tum 5 MLA-a thlan tlin a lo ni tawh a, Tlungvel bial atangin tum 3 leh Kolasib bial atangin tum 2 thlan a lo ni tawh a, Congress minsistry ah Cabinet Minister a lo ni tawh a. Tunah hian Aizawl tlaklam Kanan vengah a nupui fanau te nen an cheng mek a ni.
Rajya Sabha MP Candidate a ruat a nih chungchanga ZONET zawhna chhangin Pu PC. Zoram Sangliana chuan, a beisei loh a nih thu a sawi a, a tlin dawn leh dawn loh chu Pathian thu a ni tih sawiin an party in an au pui sakhaw tih bik neih loh chu a din chhan tur a nih thu a sawi.
