Tunhnaia Ration Buhfai sem tlai a nih chhan chu FCI leh hmun dang atanga buhfai dawn a khaihlak deuh vang niin sawi

0
530
views

Tunhnaia Ration Buhfai sem tlai a nih chhan chu FCI leh hmun dang atanga buhfai dawn a khaihlak deuh vang niin Supply Department hotuten Zonet an hrilh a. Buhfaia Mizoram innghahna ber chu FCI a nih thu leh Sorkar-in hmun dang atangin buhfai hi lei ve bawk mah se, FCI berin a chawk luh that loh chuan mipuiin harsatna an tawh thin thu supply Dept hotute chuan sawiin FCI chu chak zawka buhfai chawlut tura nawr reng an ni an ti. Supply Department hotute chuan, tun dinhmunah chuan buhfai hi a lo thleng tha tawh tih an sawi a, Aizawl khawpui chhunga veng leh khaw thenkhatah Ration buhfai hi sem tan leh tawh a nih thu an sawi a, harsatna dang a awm lo a nih chuan tunkar chhungin Ration buhfai hi sem zawh hman tum a nih thu an sawi. Supply Department chhinchhiah danin, nimin thleng khan Zuangtui Kudam-ah buhfai chhek khawl Quintal 19,641.57 a awm a, buhfai hi Tanhril-a FCI Kudam atangin ni tin thiar luh belh zel a ni a, tun dinhmunah chuan buhfai awm loh vanga harsatna a thlen loh tur thu leh hmun hrang hranga Supply Department Kudam-ah te pawh buhfai chhekkhawl a tam thawhkhat thu an sawi. Tun hnai deuha Lunglei Kudam ruak lek lek pawh dah khah lek vek tawh a nih thu Supply Department hotute chuan an sawi a. Tunah hian Mizoram sorkar-in FCI bakah Open Market atangin buhfai a lei mek a, FCI atanga Mizoram Sorkar-in buhfai a leina chu National Food Security Act hnuaiah AAY leh PHH atan Quintal khatah cheng 300, Tide Over Allocation-ah quital khat zelah cheng 830 leh Economic Cost-ah quintal khatah cheng 3,264.23 a ni a, hei bakah hian Open Market atanga Sorkar-in buhfai a leina chu Quintal khatah cheng 2,750 a ni bawk.