Union Home Secretary-in Assam leh Mizoram Chief Secretary te Bairabi thil thleng chungchangah meeting a neihpui

0
1004
views

Union Home Secretary Shri Rajiv Gauba chuan vawiin khan Assam leh Mizoram Chief Secretary te chu tunhnai 8th & 10th March 2018-a Bairabi thil thleng chungchangah meeting a neihpui.

Assam Chief Secretary Smt T.Y Das leh Mizoram Chief Secretary Arvind Ray te chuan Bairabi bul Kachurtal-a chawlhbuk sak chungchanga an state sorkar te dinhmun ve ve an sawi a. State sorkar pahnihte hian muanna vawnghim-a inngeih tawn taka harsatna chinfel an tum tlat tih an sawi nawn ve ve a ni. Helai hmun hi a awm dan pangngaia awm tir (status quo) nise tih meeting ah hian rel a ni a, a bul vela mipui punkhawm khap a ni ang. Assam leh Mizoram Sorkar te chuan an mahni lam ve ve ah boruak muanawm vawnghim turin a tul apiangah hma an la bawk ang.

Joint Secretary (North East), MHA te, Principal Secretary (Home) Mizoram leh Assam te telna Team chuan helai hmun hi hapta khat ral hmain tlawh se tih lungrual taka rel a ni bawk a. He team hi Survey of India officials ten an puibawm ang. He Team hian an thil hmuhchhuah chu Union Home Secretary hnenah thehlutin, hei hi State pahnih Chief Secretary te nena meeting neih leh hunah sawiho leh a ni ang. Hemi hnuah hi chuan Union Home Minister in Assam leh Mizoram Chief Minister te Meeting a neihpui tawh ang.