UP lawng chesualah mi 22 thi

0
501
views

Uttar Pradesh, Baghpat district-a Yamuna luiah vawiin khan lawng pakhat a chesual a, mi 22 vel tuiah an tla hlum a, mi dang eng emaw zat an bo bawk. District Bawrhsap, Bhawana Singh-a chuan lawngah hian mi 60 vel an chuang niin a sawi a, Katha khaw bulah lawng hi a let a ni. Police-ten ruang 22 vel an la chhuak tawh a, mi 10 vel an chhanchhuak tawh nia hriat a ni bawk. Bawrhsap chuan lawng hian a phurh theih zat aia tam a phurh avangin a let ta nia hriat a nih thu a sawi a, lawnga chuang tam zawk hi chu hmeichhia an ni. State CM, Yogi Adityanath-a chuan he thil thlenga thi chhungte chu cheng nuai 2 \heuh pek an nih tur thu a puang a, CM hian Bawrhsap chu vanduaina tawkte chhawmdawl tura a hriattir bakah, he thil thleng chhui chianna tur thupek a chhuah nghal a ni. He chetsualna thleng avang hian tualchhung mite leh mitthi chhungte chuan lawng chesuala thite ruang chu kawnga an zalh hnuah Delhi leh Saharanpur chhuntu lamlian chu dangin, buaina an siam a, police-te chu lunga vawmin motor-te an hal a, tualchhung mipuite hian police leh sorkar thuneitute chu che muang lutukah puhin, chetsualna thlen rual khan che nghal sela chu mi tam tak an chhanchhuak hman dawn niin an sawi a ni.