US sipai, N.Korea-a awm hlen ta, Charles Jenkins-a a thi

0
350
views

United States sipai, sergeant ni thin, North Korea rama awm hlen ta, lung in tang anga kum 40 vel awm tawh, Charles Jenkins-a chu a thi a, kum 77 mi a ni. Kum 2004 khan Jenkins-a hi North Korea-in a chhuah a, hemi hnu hian a chhungte nen Japan ramah an khawsa zui ta a ni. Kum 1960 chho-ah khan US sipai pali chu an rama haw duh tawh lovin North Korea ramah hian awm hlen a, film star an ni hlawm nghe nghe a, an zingah hian Jenkins-a chauh hi sorkarin a chhuah a, a dangte chu North Korea-ah hian an thi vek tawh nia rin a ni. Charles Jenkins-a hi nimin khan Sado thliarkarah a thi a, a nupui, North Korea-a tang ve bawk, Hitomi Soga nen he hmunah hian an cheng a ni. Kum 1965-ah khan, South Korea ramah Jenkins-a hi dah a ni a, sipai hna hi bansanin North Korea lamah a tlan lut ta a, North Korea ram a thlen chuan Russian embassy humhimna dil a, engtikah emaw, lung in tang inthleng hunah America rama haw leh theih a beisei nia hriat a ni. Mahse Russia hian humhimna a pe duh ta lo a, North Korea sorkar mi tang a lo ni ta a ni.