Vaivakawn, Hunthar peng chhak, nikum lama lei chetna laia ding, chenna in pahnih chu a him loh avangin Aizawl DC thupekin vawiin atang khan thiah tan a ni.

0
43
views

Vaivakawn khawtlang hruaitute hnen atanga ZONET thudawn danin helai bial hi tun hnai khan a che nawn leh a, hei hian Pi Rosiamliani leh Pi Lalniengi In chu chim mai thei dinhmunah a siam a, Pi Lalniengi Building che hian a bula Pi Zahmingliani In bang Brick rem chu a nawr chim a, vanneihthlak takin bungraw tihchhiat leh mihring hliam a awm lo a ni. He thil thleng chungchang hi Vaivakawn khawtlang hruituten Aizawl DC ah thlen nghalin thil awmdan enfiah a nih hnuah Pi Rosiamliani leh Pi Lalniengi In chu thiat turin DC in thupek a ti chhuak a ni.

A hmuna kal kan Corr. sawi danin In pahnihte hi chim mai thei dinhmunah an awm a, a ban thenkhat chu inzawm tawh lovin a inpelsawlh vek tawh a, in bang, kailawn leh chhuat te pawh a khi chat nual tawh a, thinga siam pindan bangrel te pawh a kawi nasa a, bathlar chhuat te pawh a khi nasa hle a, a bula Chanmari West panna kawngpui leh In inkar, lei pawh a khi chat tawh a ni.

Helai hmun hi nikum khan nasa takin a lo che tawh a, chhungkaw engemawzat hmun him lamah an lo insuan chhuak tawh a, Pi Rosiamliani leh Pi Lalniengi te In pawh hi rauhsan zingah a tel a ni.