Vawiin hi MNF party President hmasa ber, Chief Minister hlui Pu Laldenga thih cham vawi 30 a ni a, Treasury Square-a a thlanah MNF party miten zahna lantirin pangpar an dah.

0
53
views

MNF President Pu Zoramthanga Chief Minister leh Pu Laldenga nupui Pi Biakdiki ten pangpar an dah hmasa ber a, a hnuah Minister, MLA leh party miten an dah leh a ni.

MNF President Pu Zoramthanga chuan, Pu Laldenga ang chu Mizo nuin an hring leh ang em, tih rin thiam har tak a ni a, a ropuina chu nitin Mizo hnam leh thangthar lo la awm zel turte tan chhutchhuah kim a la ni lo a ti. A thih champha lo thlengah Mizo mipui ten an ngaih ropuina leh chawimawina an hlan a, an hlan chhunzawm zel dawn a ni a ti.

Pu Laldenga hi kum 1927 July ni 11, khan Lunglei Pukpui khuaah a piang a, kum 1944-ah British Indian Army a zawm a, kum 1959-ah Mizo National Famine Front dinin, a hnu kum 1961 October ni 22 ah Mizo National Front tiin an thlak a ni. MNF leh India sorkar inremna an ziah hnu kum 1986 a Mizoram sorkar lailawk (interim)-ah Chief Minister a ni a, kum 1987-a Mizoram state Assembly inthlan hmasa berah Sateek leh Aizawl North-II bial atanga thlan tlin a ni a, state nih hnua Chief Minister hmasa ber a ni. Kum 1990-ah Memorial Sloan Ketering Cancer Centre, USA-ah thla thum enkawl a nih hnuin Mizoram pana an haw kawngah, Ashford Hospital, London-ah kum 1990 July ni 7 ah a thi a, Aizawl Treasury square-ah July ni 13 khan phum a ni.