CEO hian vawiin khan Aizawlah chanchinbumite a kawm a, Zonet corr zawhna chhangin Campaign tawp hun tia sawi vawiin tlai dar 4 hnuah chuan Party leh Candidate te tan vantlang inkhawm leh rally ang chi te huaihawt phal a ni tawh lo a, hetihlai hian hun tiam ral hmaa political party te campaign thu erawh chanchinthar lamah tih chhuah phal a la ni a ti.
CEO chuan Mizoram Assembly inthlanpui, naktip Nilainia neih turah ruahmanna engkim peihfel a ni tawh tih a sawi a, District tina inthlanna buaipuitu tur District Election Officer te inbuatsaihna pawh a \ha tawk a, polling station hrang hrangah te mipui mamawh tur tui, kawlphetha leh mamawh dangte pawh peihfel vek a ni tawh tih a sawi. Service Voter mi 4363 te chu Electronic Ballot hmanga vote thlak fel tir vek an ni tawh tih pawh CEO chuan a sawi a, pianphunga rualbanlo mi 3915 te tan pawh a bik taka ruahmanna siam a ni a, Constituency tinah polling station pakhat zel chu hmeichhia vek duty-na, All Women Polling Station ah siam a ni a ti.
Inthlanna muanawm leh felfai buatsaih anih theihna turin Mizoram leh \henawm state leh ramdang nena inkalpawhna kawngpui \henkhat pawh khar \an a ni tawh tih CEO chuan a sawi a, zu leh ruihhlo dang khap kawngah a mawhphurtu Dept ten hma an la a ni a ti. Tripura Camp-a awm Bru ten vote an thlakna tur Kanhmun pawh nimin lamah a tlawh thu CEO chuan sawiin, Bru te vote thlakna tur hian Polling Station 15 siam a ni a ti a, Kanhmun khawtlang mipuiten \ha taka an \awiawmna ah lawmthu sawiin, CEO chuan Bru vote thlak turte Kanhmuna hruai thlen hna chu Tripura CEO kutah dah a ni a ti. Zawhna chhangin CEO chuan Camp paruka awm Bru, Kanhmuna vote thlak turte hi Tripura CEO ruahmanna in Kanhmun lei bul thleng hruai an ni ang a ti a, an kalna leh hawna senso erawh Mizorm sorkarin a tum tur a ni dawn tih a sawi.
Chief Electoral Officer Pu Ashish Kundra hian vote zaa 90 tal a tlak ngei a beisei thu sawiin, vote thlak ni chu ‘Hnam Hnatlang’ anga ngaia vote thlak vek turin, Mizo mipuite a sawm a ni.
