Zemabawk leh Tuirial inkar kawng siam mek chu MNYF Gen. Hqrs. hruaituten vawiin khan an tlawh. Hemi hnua thuchhuah an siamah MNYF chuan kawng blacktop chu a chhe hle niin an sawi a, kawng khuar lai chu leivunga hnawhin an blacktop hnan mai nia sawiin, Blacktop thenkhat chu kutlawng pawhin a phawh hlawk hlawk theih niin an sawi. MNYF chuan, thingtlang atanga Aizawl luhka kawngpui pawimawh leh lûn ber zinga mi he kawngpui hi Aizawl khaw chhung chin tha pangngai tak siam a nih laiin, Aizawl pawn zawng chu a nih dan tur ang a ni phak lo hle niin an sawi a, thingtlang mite zahlohna lian takah an ngai tih an sawi. MNYF chuan, kawng siam tha lo nia an sawi chu a enkawltu PWD Minister mawhah an puh a, minister chu kawng siamna senso tur atangin chanpual a nei em ni tih an zawt tih an sawi. Kawng siam zawh tawh anga lang, tha si lo lai te chu siam tha tur leh siam hmabak la awm te pawh rintlak leh tha taka siam turin kawng enkawltute an phut tih MNYF te hian an sawi bawk. —————-
Aizawl South-II Area Mizoram Upa Pawl General Conference vawi 27-na vawiin khan Mission Vengthlanga SMTC Hall-ah neih a ni. Conference hmanpuitu Finance Minister, Pu Lalsawta chuan MUP member te chu tawnhriat ngah leh thluak fim tawh an ni tih sawiin, sorkar thu rawn pe thin turin a chah a, tuna Mizorama MUP memberte zingah zirna lamah eizawnna hna hrang hrangah harsatna tinreng paltlang tawh, mi hlawhtling hmasa thahnem tak an awm niin a sawi bawk. Aizawl South-II Area MUP General Conference-ah hian palai hmeichhe zinga upa ber, Pi Lianthuami, kum 85 mi leh mipa zinga upa ber, Pu Saihleia, kum 96 mite hnenah chawimawina certificate leh pawisafai a hlan a ni. He Conference-ah hian eirawngbawlna gas tihchingpen leh petrol pawlh dal awm thin tih tawp a nih theih nan te, Aizawl khawpuia Veng hrang hrangah leh thingtlang khaw tinah tuallai tih enna tur street light pek a nih theih nan te tan la turin sorkar ngen a ni. He inkhawmah hian MUP Headquarters President, Pu RK Thanga pawhin thu a sawi a ni. ————–
Kum 2018 atanga kum 2019 thlenga Aizawla Pang Zirlai Pawl Joint Hqrs. hruaitu tur vawiin khan MSU Pisa puiah thlan a ni a, President atan C. Lalhmangaihzuala, Vice President atan Golden K. Lalnunhima, Treasurer atan Gospel C. Lalsiamthari leh Secretary atan K. Lalmuansanga te thlan an ni. He inthlannaah hian Pang Zirlai Pawl Gen. Hqrs. Treasurer, Immanuel Lalhminghlua chu Returning Officer a ni.
