Zoram Peoples Movement pawhin, MP leh Aizawl West-I By-Election-a an Candidate thlawp te tling zo lo mah se, an mahni vote tute chungah lawmthu an sawi a. Hetihrual hian a tlingte pahnih Pu C. Lalrosanga leh Pu Zothantluanga chu an lawmpui hle tih an sawi.

Thuchhuah an siamah ZPM chuan, an candidate ten hlawhtlinna chang zo rih lo mah se, an thawhrimna leh inpekna chu ropui an tiin an chhuang takzet a ni, an ti a. An thiamna leh theihna Zoram tana hlan chhunzawm zel turin an beisei tih an sawi. Lok Sabha member atana thlan tlin tak Pu C. Lalrosanga a kal leh zelna turah duhsakna an hlan a, hetih rual hian MP a nih anga Mizoram mipui tana theihtawp chhuah tur leh a intiamna ang ngeia BJP sorkarin CAB tihhlawhtlin tuma a hmalak lehna turah pawh huaisen taka dodal ngam turin ZPM Gen. Hqrs chuan a beisei tih an sawi.