Vawiina an Party Pisa-a thuthar lakhawmtute a kawmnaah Serchhip bialtu MLA, Pu Lalduhoma chuan, sorkar hmasa hun laia Lottery Distributor thlan danah thil dik tawk lo a awm nia MNF-in an sawi avangin Congress kaihhruai sorkar chuan nikum July ni 9 khan Lottery chu a zavaiin a titawp a, vawiin thlenga chhunzawm a ni ta lo niin a sawi a. Hei hi MNF kaihhruai sorkar thar chuan ngaih pawimawh hmasaah neiin, sorkar hmasaa Lottery kalpuitu mi 4-te tho inremna a siampui a, he inremna hi kumin September thla thleng daih tura tih a nih laiin, pawhsei theih a nih tur thu inremnaah chuan tarlan a ni a, hei hian inremna chu pawhsei tum sa a ni tih a tilang nghal a ni a ti a, hemi piah lamah hian heng Distributor 4-te nena inremna chu nikum lamah tihtawp a nih tawh avangin a thi vek tawh a, tihnun thar leh chi a ni tawh lo niin a sawi. Pu Lalduhoma chuan, Lottery chu an kalpui duh a nih pawhin Tender hmanga koh tur a nih laiin, tender pawh chhuah lova Distributor rawih chu dan kalh a ni, a ti a. Model Code of Conduct hman a nih laia hetiang thil kalpui a ni chu dan bawhchhiatna a ni tih sawiin, hemi chungchang hi CEO hnenah an thlen dawn tih a sawi.
Chief Minister, Pu Zoramthanga chu mipui hriata dawt chiang tak sawiah puhin, Pu Lalduhoma chuan, ZNP leh MPC-in NDA an zawmna an tihtawp thu House-ah chiang taka a sawi tawh chunga tun hnaia thu a sawinaah ZNP leh MPC-te NDA zawm ve anga a sawi chu CM meuh tan chuan thil tih awm lo tak a ni, a ti a. Tun chinah chuan mipui hmaa thudik tawk lo sawi tawh lo tura a duh thu a sawi.
Zawhna chhangin, Pu Lalduhoma chuan, Politics chhiarkawp hmanga a lan dan chuan Lok Sabha leh Bye Election neih turah \angrual candidate-te chu tling ngei tur an ni, a ti a. A bikin Aizawl West I biala Bye Election neihna tur chu ama chhuahsan a nih bakah he bial hi in leh lo a neihna hmun a nih avangin \angrual pawl candidate thlan tlin a nih chuan nasa taka a puih theih a rin thu a sawi.
