Thuchhuah a siamah Pu Lalduhoma hian hrileng chungchang hriatna a rei tawh hle laiin sorkar inbuatsaihna erawh a dawrawm hle a ni a ti a. Nikumah khan he hri hi China atangin a darh tih hriat ni tawh mahse Health Minister-in lo inrinlawkna tura cheng nuai 132 a dil pawh kumin february ni 25 khan Finance Deptt. In a hnawlsak a ni a ti a. Virus enna khawl lei kawngah pawh sorkar a che muang lutuk a, test loha quarantine atanga chhuak sang 3 zet Mizoramin a neih sa te chu nitin an pun belh zel avangin a rang thei ang bera khawl lei belh vat a tul a ni a ti.
CM Instagram account hmanga lockdown kalpui tur leh tur loh chungchang mipui ngaihdan lak chu Pu Lalduhoma hian mipuite kuta rul kaw zen tumna, mawhphurhna la ngam lo dawihzep thiltih-ah a puh a. “Rorel ngaihna ka hre ta lo” tihna ang a ni a ti.
