ZPM Rajya Sabha Candidate, Pu B. Lalchhanzova’n he inthlan a chuh chhan chu a tlin tur leh tur loh lam ni lovin, Mizoram awm zel dan tur thlir chunga tul a tih vang a ni tih a sawi.

0
14
views

Vawiina Aizawl Press Club-a thuthar lakhawmtute a kawmnaah Pu Chhanzova hian, naktuka Rajya Sabha member thlanna neih tur chu mipui hnena Rajya Sabha member awmzia leh nihphung hrilhfiahna tha tak nia a ngaih thu a sawi a. Kum dangah chuan Rajya Sabha member thlanna hi mipui kutthlak a ni lo tih changchawiin thawm zawi tak leh mipuiin an hriatpui lem lova kalpui a ni thin a, thlan tlin an nih hnuah an pawimawh zia an hre leh chauh thin a ni, a ti a. Rorel lai pawlten an mi duhsak zawng emaw, phumbo an tum tute emaw dah nan an hmang thin ni anga ngaihtheihnate pawh a awm a, hei hi thil tha lo tak a ni a ti a, uluk zawka ngaihtuah chuan Rajya Sabha member-te pawimawhna chu mipuiin an hre chho zel a ni, a ti.

Kum 2018 MLA General Election-ah khan mipuiten ZPM chu bial pariat laiah an thlang tling tih ZPM General Secretary ni lai Pu B Lalchhanzova hian a sawi a, mipuiten ZPM laka an beisei san zia a lan tawh avangin, Rajya Sabha member thlanna neih tur chu kum 2023-a Sorkar-na an chelh hun atan, inbuatsaihna pawimawih takah a ngai tih a sawi.

ZPM chu kalphung mumal tak neiin a kal chho niin Pu B Lalchhanzova hian a sawi a, Val Upa Council uapna hnuaiah MLA 7-in an tlawp a, an sorkar hunah tha zawka rorel thei turin an hmachhawpte uluk taka duangtu pawl, Research Wing tha tak an nei tih a sawi a, heng an hmaa thil inchhawpte thlir chuang hian Rajya Sabha member thlanna pawh hi lawm leh phur takin a chuh tih Pu B. Lalchhanzova hian a sawi.