He thu hi nizana Vaitin a vantlang inkhawm buatsaihah sawiin Pu K Sapdanga chuan, tualchhung sorkar Village Council leh Local Council dinglai chu April ni 30 ah an term an hmang zo dawn ta tih a sawi a, hemi hma hian sorkarin inthlan thar a buatsaih a rinthu sawiin ruling party nih vang ngawta thlan tlinte chu thlan tlin an nih hnuah an inluling deuh zel a, tualchhung tihhmasawnna aiin, mahni hamhaina contract hna lam an buaipui nasa zawk \hin tih sawin hemi avang hian tualchhung Sorkar atan ruling mi an nih leh nih loh aiin, khua emaw veng emaw hmasawnna vei mi, kutke atana mi rinawm leh mi taima an \ha ber tih a sawi. Pu. K. Sapdanga chuan, tualchhung Sorkar chu state sorkar chhiahhlawh tur emaw, kutke tur emaw an ni lo nia sawiin an mahni thlangtu mipuite rawngbawltu, kutke tur zawk an ni a ti a, hemi avang hian VC leh Local Council inthlan hunah pawh thil dang zawng aiin mipuiten an mi duhzawng an thlan chhuah a pawimawh ber a ni a ti. Pu K. Sapdanga chuan, rorel lai party thlan tlin an nih loh chuan, development sum lamah hrek an ni ang,” ti zawnga invauna, insawi\haihna a awm \hin thu a sawi a, hei hian khua leh veng aiin an party an ngai pawimawh zawk zia ti langtu a nih thu sawiin Politics khelh dan tenawm ber, ramhlui zia dik tak a ni a ti a, hetiang hmanrua hmang duhtute chu hnawl ngei zawk tur an nih thu sawiin Khua leh Veng nuam siam a Village Council leh Local Council atan, mahni khua leh vengin an rinngam leh mi rinawm taima leh huaisen thlang turin mipuite a ngen a ni.
