Vawiina Aizawl Press Club-a thuthar lakhawmtute a kawmnaah Pu F. Rodingliana chuan, Mizorama MNF kaihhruai sorkar thar lo piang ta chu an lawm hle tih sawiin, hun laklawha rorel tura Pathian ruat nia an ngaih thu a sawi a. MNF sorkar-in Aizawla Traffic tawt lutuk tiziaawm tura hmalak a tum chu an lawm hle tih sawiin, Chief Minister-in a tiam anga kawng chhawng siam a nih hma pawhin lirthei intlanchhawk chu tihtawp ni se an duh hle tih a sawi a, he dan hi ruahmanna mumal awm lova siam a nih avangin Aizawl a titawp zual a, lirthei neih kawngah khuahkhirhna a awm loh avangin a nei faten awlsam takin lirthei dang an neih belh a, mirethei zawkte pawhin an mamawh ve tho avangin an theih ang ang an ngaihtuah belh a ngai a, kum danga kumtin lirthei 5,000-9,000 vela pung \hin chu intlanchhawk hnuah chuan kum 2/1 chhung lekin lirthei 19,454-in a pung niin a sawi.
ZPM Senior Vice Chairman chuan, Mizoram Assembly inthlanpui neih zawh taka kalphung thar din duhtu, ZPM-in mipui thlawpna \ha tak an hmu chu an lawm hle tih a sawi a. ZPM chu kalphung thar neih duhtu an nih avangin an tum leh ruahmanna siam ve pawh an tipuitling hman lo niin a sawi a, heti chunga Mizoram puma vote nuai 1 leh sing 5 vel zet an hmu chu thil lawmawm tak a ni, a ti. Pu F. Rodingliana chuan, inthlan inbuatsaihna atana Mipui buhzem an dawhah cheng nuai 30 zet a tla chu an lawm hle tih sawiin, hei hian mipuiten kalphung thar an duh zia a tilang a ni, a ti a. Inthlan zawh hnuah Steering Committee engemawzatin an Candidate-te hnena an pawisa hman ban an pekir lehte chu Zoram Politics-a thil la thleng ngai lo nia an hriat thu leh kalphung thar an duh vanga an candidate tling zo ta lo an awmte chu uihawm viau mah se, lawmawm an tih thu a sawi bawk.
