Lai Autonomous District Council hnuaia VC 8 leh Chakma Autonomous District Council hnuaia VC by-election, nimina neihah seat ruak zawng zawng, 19 zinga 11 chu Congress candidate ten an la a, MNF-in seat 5, Independent-in seat 3 an la nia thu dawn a ni. Heng result-te hi State Election Commission-in a la puan loh, hmun hrang hrang Party hruaitute hnen atanga kan Correspondent-te dawn khawm a ni a, chumi ang chuan Chawngteluia seat khat chu Congress-in a la a, Ngengpuiluia seat 4 MNF-in an la vek a, Hmawngbuchhuaha seat 4 zinga seat 3 chu Congress-in an la a, Independent-in seat khat a la a, Dumzautlang leh Bolisoraa seat khat ve ve chu Congress-in a chang a, Tuisentlanga inthlanna seat zawng zawng, 4 Congress-in an la vek a, Lawngtlai Vengpui inthlanna seat 2 chu MNF leh Independent-in an insem a, Archhuanga seat khat chu Congress-in a la bawk. Chakma Autonomous District Council hnuaia Gabasury VC seat khata inthlanna-ah Independent a chak bawk a,
result hi telephone-a tanga dawn a nih avangin Mizoram State Election Commission-in official-a a puan hnuah danglam leh thei a ni. VC member thlan tlin takte nen hian inthlanna VC-te chu tun thla ni 26, Inrinni ral hmaa Executive Body siam vek tura hriattir an ni.
