Dr. BD Chakma-a banna thehluh CM-in Larsap hnenah thawn

0
318
views

Minister of State, Dr. BD Chakma-a’n Council of Ministers atanga banna a thehluh chu pawm atan CM, Pu Lal Thanhawla’n Larsap hnenah a thawn. Zonet thu dawn danin, Dr. BD Chakma ban chungchang hi nimin khan CM, Pu Lal Thanhawla hovin Congress Party MLA leh hruaitu thenkhatin an sawi hova, ngun taka an ngaihtuah hnuah Dr. BD Chakma banna hi pawmpui turin Larsap, Lt. Gen. Nirbhay Sharma hnenah nimin tlai dar 5 vel khan CM hian a thawn a ni. Dr. BD Chakma banna pawmpui rawtna, CM-in a thawn hi nimin tlai khan Larsap chuan a dawng nghal a, vawiin thleng khan a pawmna erawh chu a la ziak lo nia thu dawn a ni. CM, Pu Lal Thanhawla chuan, Minister dang lak luh belh emaw, Minister-te hna chanpual siksawi tumna emaw a awm rih lo niin a sawi a. Dr. BD Chakma banna a pawm chhan chu inen hranna vang a ni lo tih sawiin, Mizorama dan dik taka Chakma awmte chu en hranna an neih loh thu leh dan dik taka Mizorama chengte chu sakhua leh hnam thliar lovin ang khat veka en an nih thu a sawi. Puan tawh angin, Minister of State, Dr. BD Chakma hian tun kar Thawhtanni khan a banna hi CM hnenah a thehlut a. A lehkhaah chuan, National Eligility cum Entrance Test (NEET), 2017 hmanga Mizoram Quota-a MBBS leh BDS zir tura thlan zinga Chakma zirlai 4 chu chhan leh vang awm lova hnawl tum nia sawiin, hei hi a tan pawm theih a nih loh thu leh mipui aiawha rorel tura thlan a nih angin hnam, chi leh sakhaw hrangte tana inang tlanga rorelsak tur a nih laia chi leh sakhaw inthliarna rawng kai zawnga thil tih chu tha lo a tih thu sawiin, CM chu a banna pawmsak turin a ngen a ni.

Puan tawh angin, NGO Coordination Committee chuan Dr. BD Chakma hi ram danpui hnuaia a tih tur ti lo leh a tih loh tur ti-a puhin, kumin July 27 khan Minister of State a nihna atanga bàn turin CM an lo ngen tawh a. Tun thla ni 18-a NGO Coordination Committee thukhawm chuan hemi chungchang hi naktip, tun thla ni 25 thleng ngaihchan phawt a, a ban loh chuan ni 26-ah inhmuh khawm leh a, a tul dan a zira kawng zawh leh Total Bandh huaihawt an tum thu an lo puang tawh a ni.