Phulmawi Branch YMA pawhin YMA day hi NREGS Hall-ah an lawm a, a hmanpuitu Bialtu MLA Pu Lalrinmawma chuan, ram leh hnam humhalh turin thawh hreh neih loh a ngai a, hnam dang thuhnuaia awm lohna turin hnamdang thiam ang te thiam ve zel a pawimawh tih a sawi.

Inkhawm hi Phulmawi Branch YMA Vice President Pu Lalropuia’n a kaihruai a, Branch President Pu Lalrova Hmar in ‘ram leh hnam humhalh” tih thupui hmangin thu a sawi bakah PWD EE Lalrinmawia leh VCP Pu Lalliankuma ten thu an sawi bawk.

Sairangah pawh tuilian a kam tawh avangin vawiin khan YMA Day an hmang thei a, Bazar Venga YMA Hall-ah Mizo hnam lam leh infiamna chi hrang hrang, inkawibah, insuknawr, inhruipawh te neih a ni a, tlai lamah artui nen Chhawng an hnawt a ni.

Sialsuk Joint YMA pawhin Lal\anpuia Hall-ah YMA day an hmang a, a hmanpuitu bialtu MLA Pu KS Thanga chuan, Pathian in Mizo te YMA a din sak chu a vanneihthlak a ni a ti a, midangte tan malsawmna ni turin YMA-a tha thawh nachang hre turin YMA day hmang tute a chah a ni. Pu KS Thanga hian Aizawl South III huam chhunga HSLC leh HSSLC passed tharte lawmpui nan Oxford Dictionary a hlan bawk.

Zuangtui Branch YMA in YMA Day lawmna an buatsaih hmanpuitu Dy.Speaker Pu R.Lalrinawma chuan member kalkhawmte chu YMA thupui leh thil tum hrang hrang hlenchhuah tum turin a chah a, ram leh hnam humhalh chu mimal tin hmalakna tur a ni a ti.

Inkhawm hi Zuangtui Branch YMA Vice President Pu Ramdinliana’n a kaihruai a. YMA member boralte sunna hun an hmang a. MUP Zuangtui Unit leh Local Council aiawhten thu an sawi bawk.

Lunglei khawpui chhungah chuan veng hrang hrangin YMA day pualin a theih dan ang angin an veng chhung an thianfai a. Lunglei Electric Veng Branch YMA chuan Mizo infiama YMA Section hrang hrang inelna vawiin khan an buatsaih a, hemi hmalam hian Lunglei Civil Hospital-a damlote tan thisen unit 19 an lo pe tawh a, Hrangchalkawna TNT leh Serkawna Baptist Kohhran hnuchham chawmna in, Baptist Church Orphanage-ah te \anpuina an pe a ni. Khaw awmdanin a zir loh avangin veng tin deuh thaw-in YMA Day hi Hall-ah an hmang a, kumpuan thupui ‘Ram leh Hnam humhalh’ tih an sawi bawk a ni. Central YMA Vice President, Pu R. Lalngheta chuan YMA Day a hmanna tur East Lungdar leh North Vanlaiphai te kawng ping vangin a thleng thei lova, Serchhip a\angin a lo let leh a ni.

Phulpui khua chuan tihdan dang deuhin YMA Day an hmang a, Zawlpala thlan tlang sikul hmun hluia Zawlbuk an sak Bawhbel tur thing lian tak Luangpawl ram a\angin an zawn chhuak a, a zawn chhuahnaah hian YMA member mi 150 vel an tel a, Zawlbuk-a a dahna tur hmunah an dah nghal a ni.