5th IR Bn hmunpui, Lungverh-a awm, National Disaster Responce Force, NDRF mi leh sa 15 ten Coronavirus an kai tih hriat chhuah a nih avangin Lungverh leh Sairang Dinthar ah te mipui an inkharkhip.

0
11
views

Lungverh-a khawtlang hruaituten Zonet zawhna an chhan danin NDRF mi leh sa, hri leng an kai tih hmuh chhuahte zingah hian phai lam atanga lo hlim ni lo, a awm sa te pawh an tel avangin mipui an ralkhel hle a, hri an kai tih hmuh chhuah tharte zingah canteen leh dawr danga kal te, volleyball lo khel te an awm avangin chanchin an hriat atangin mipuite an inkharkhip nghal a ni. Heng mite nena inhnimhnaihna lo nei tawh nia rin te sample chu medical team ten an lak sak tawh a, result an ngaichang mek a ni.

Lungverh-a thil thleng vang hian Sairang Dinthar khawtlang pawhin vawiin atang khan Curfew an puang a. Hemi chungchanga thudawn danin, Sairang Dinthar hian Lungverh-a NDRF hnenah hian tui an pe thin a, kawng dahah inhnaiah emaw dang an neih bawk avangin fimkhur thu-ah Curfew hi puan a ni a. Hetihlai hian Sairang khuaah erawh Curfew hi puan ala ni lova, chutihrual hian mipuite chu fimkhur turin an inhriattir a, thil danglam a thleng a nih chuan, a tul huna Curfew puan mai thei tur erawh chuan an inralring reng tih Sairang VCP-in a sawi.