Vawiin session-ah MNF member, Pu Ramthanmawia leh Prof. F. Lalnunmawia, ZPM member Pu Vanlalhlana leh Pu VL Zaithanzama te zawhna leh zawhbelhna dangte a chhannaah Pu C. Lalrinsanga chuan, Mizorama Buh thar tipung tur hian State Sorkar Flagship Programme, SEDP bakah Centrally Sponsored Scheme hmanga hmalak tum a ni, a ti a. Hemi atan hian NFSM hnuaia Component pakhat NFSM-Rice kaltlangin hlawk zawka Buh thar dan tur ngaihtuah a ni dawn a, Buh chi \ha leh thar hlawk sem a nih dawn bakah Buh chinna atana mamawh chi hrang hrang ngaihtuahin loneitute Training pek tum a ni a, khawl hmanga hnathawh a nih theih nan Leilei siam rualin, khawl hmanga Buh phun leh a seng thlenga tih tum a ni a, Custom Hiring centre hnuaia Tractor leh Power Tiller hmanga \ha zawka Buh chinna buatsaih tum a ni, a ti. Irrigation and Water Resources Development kaltlangin tuikawng leh tuikhuah siam belh tum a ni a, khawl thar Drill Rig an neih hmangin leihnuai tui pump chhuah tur verh tum a ni a ti bawk.
Pu C. Lalrinsanga hian, SEDP hmangin leileta siam theih ram ruak awmte chu a tam thei ang ber leilet atan siam tum a ni, a ti a. Hei bakah hian Terrace laih belh a, leilet siam rem ngai leh siam\hat ngai awmte siam blehin, a theihna hmun a piangah kum khat chhunga buh \um 2 thar hman tura \anlak a ni dawn tih a sawi.
Zawhna dang a channaah Agriculture Minister chuan, Serlui bial chu Buh thar tam theihna hmun \ha a nih avangin nasa taka hmalak tum a ni tih a sawi a. Serlui bial chhung bikah hian tun hma lam a\angin leilet awm sate chu hnam dang enkawl tir \hin an ni a, an Buh thar chhuah tamz awk chu phai lama a kal \hin avangin a bial chhunga \halai rualten hei hi an ngaimawh hle a. Tun hnai khan \halai rual intelkhawm mi 3 velin amah hmuin hmathar lak an duh thu an hrilh chu sorkar pawhin a ngai pawimawh hle a ni, a ti a. Ruahman dan chuan tuna leilet awm sate bakah leilet atana siam theih ram ruak awmte chu a zau thei ang ber leilet atan siam tum a ni a, hemi atana hian bial District Agriculture Officer chu Survey lo nei tura tih a ni a, a zirchianna a thehluh thuai beisei a ni, a ti.
