Aizawl Hospital and Research Centre leh Care Hospital sorkarin pawm tawh lo

0
2253
views

Mizoram sorkar chuan Khatla-a Aizawl Hospital and Research Centre leh Dawrpuia Care Hospital-te an pawmpuina a hlip. He mi chungchanga vawiina sorkar thuchhuah tarlan danin heng damdawi in 2-te recognition a sutna chhan hi BPL chhungkuate’n dam loh nikhuaa damdawi in awm man an hmuh let theihna Rashtriya Swasthya Bima Yojna (RSBY) chu heng damdawi in pahnihte hian an hman ve duh loh vang a ni a, sorkarin a pawmpuina a sut tak avang hian Aizawl Hospital and Research Centre leh Care Hospital-ah te hian sorkar hnathawkte tan Medical Reimbursement a Bill theih tawh dawn loh a ni.

H&FW Notification

Hemi chungchanga sorkar hriattirna hi vawiin khan Health Secretary Pu Lalrinliana Fanai-in a chhuah a, hetianga hremna Aizawl Hospital and Research Centre leh Care Hospital pek a nihna chhan hi tum eng emaw zat Mizoram sorkar leh Mizoram State Health Care Society-in RSBY hmang ve tura a ngenna a rate hniam avanga an tih hlawhtlin duh loh vang a ni. He thu tlukna hi kumin July ni 11-a Chief Minister Pu Lal Thanhawla hova thukhawm chuan a siam a ni. Sorkar thuchhuah chuan he hriattirna vawiin a chhuah hma a heng damdawi in pahniha sorkar hnathawk damlo lo enkawl tawhte Medical Reimbursement Bill erawh chu pawm a ni dawn tih a tarlang bawk a ni.