Aizawl khawpui chhunga kawng chhe zual lai PWD-in thawm tha

0
432
views

PWD chuan Aizawl khawpui chhunga kawng chhe zual lai thawm that hna ngawrh takin a thawk tan. Khaw awm danin la zir tawk lo mahsela mamawhna avangin Aizawl Road South Division leh Road North Division chuan anmahni bial chhung ve ve-ah kawng chhe zual lai siam that leh a khuar zual lai hnawh hna tunhnai atang khan an thawk a, tunhma lama Alkatra an hman ang ni lo, Emulsion tui, Rora nena chawh pawlhin kawng chhe lai leh khuar lai an hnawha, Engineer-te chuan Emulsion hi tui huh ngam, tlo tho si, chhuan ngai lo leh boruak tibawlhhlawh lo chi niin an sawi a ni. Aizawl Road South Divison-in tuna Aizawl khawpui chhung kawng chhe lai a siam that mekna te chu Mission Vengthlang kawng leh Model Veng kawngte, Aizawl By-pass road leh Melthum leh Zampuimanga lung inkarte, College Veng leh Bethlehem Veng inkarte, JL High School kawngte, Maubawk leh Lawipui inkarte a ni. Aizawl Road South Division hian hemi hma lam hian Aizawl-Reiek kawnga Vaipuanpho lui bula tui lianin kawng a hawrh chhiat lai pawh Cement Concrete-in an lo siam tawh a ni. Aizawl Road North Division-in Aizawl khawpui chhunga kawng a siam that mekna te chu Bungkawn leh Vaivakawn inkar kawng engemaw chen RCC-a siam hna te, a bak siam thaa Blacktop hna thawh mekte, Zarkawt atanga Macdonald Hill panna kawngte, Zemabawk – Thingkhim kawngte a ni a, khaw awmdanin a zir chuan huam zau zawka hma la in Aizawl khawpui chhung kawng tam tak siam that thuai an tum a ni. Hetih lai hian nimin piah leh nimina ruah sur nasa avanga Mizoram chhung hmun tam taka lei min vanga kawng pingte chu lirthei chitin kal theiha siam tlang a ni leh tawh niin PWD hotute chuan an sawi a, kawng siam tlang leh tak zingah hian National Highway 54, Baktawng Chanbuk bula pingte, Mamit kawng, National Highway 44-A, Dapchhuah leh Daplui inkara leiminin a hnawhpinte leh Muallungthu – Khumtung kawng te pawh an tel a ni.