Mizorama loneitu intelkhawm, Farming Society 12 hnenah vawiin khan Agriculture Minister, Pu KS Thanga’n Tractor a hlan. Thusawiin Minister chuan Sub Mission on Agriculture Mechanisation leh RKVY Scheme hnuaiah Custom Hiring Centre 58 din a nih tawh thu leh, he hmalakna-in a tum ber chu kut hnathawktuten hlawk zawk leh awlsam zawka hna an thawh theihna tura tanpuina pek a ni tih a sawi. Pu KS Thanga chuan Mizoram hmun hrang hrangah Link road km 450 chuang laih tawh a ni a, tunah hian NEDP sum hmangin Agriculture Link road thar km 400 laihna atan cheng nuai 2012 dah a ni bakah, kawng laih tawh chei that nan cheng vaibelchhe 10 dah a ni ti bawk. Vawiina sem chhuah tak Tractor-te hi Sub Mission on Agriculture Mechanisation leh RKVY hnuaiah loneitu intelkhawmte hnenah hlan a ni a. A man za-a 95 chu sorkar-in a tum sak a, a bak za-a 5 chu kut hnathawktute tum ve tur a ni. Kumin chhung hian Agriculture Department-in kut hnathawktute hnenah Tractor 14 a pe chhuak tawh a, vawiina dawngtute chu SMAM Scheme atangin Aizawl District-a Phuaibuang Farmers Association, Champhai District-a Khuailui M.I Project Water Society, Saikhumphai II-a FMC Vaphai, Hmunhmelthaa FMC Phaithlang zau, Khawzawla FMC Tuisen, FMC Farkawn, Mamit Distrcit-a Nalzawl Oil Palm Growers Association leh Serchhip District-ah FMC Keitum, Mat ral WRC Society Lungbu Zau leh FMC East Lungdar bakah RKVY scheme atangin Phullena Tuidam zau, Suangpuilawn Agriculture Farmers Society, Serchhip District-a FMC Lungchhuan, Champhai District-a Sialhawk WRC Farming Society-te an ni. Heng Society leh Association hnuaiah hian kut hnathawktu chhungkaw 643 an awm a ni.
