Aizawl Smart City Ltd. hmalakna-a traffic light hmanga kawng kanna Pelican Crossing hmun 10-a bun chu UD&PA changtu Dy. Chief Minister Pu Tawnluia’n vawiin khan a hawng.

0
15
views

Pelican Crossing System bun nan hian cheng nuai 22 sing 1 sang 7,810 sen a ni a, he hna hi Delhi-a M/S Innovations-in an thawk a, Aizawl khawpui chhunga Kawngpui lunlai leh mihring tamna lai hmun 10-ah dah a ni a, Traffic Police ten an enkawl dawn a ni. Pelican Crossing System hi vawiin atang khan hman tan nghal a ni.

Hemi puala inkhawm tawi buatsaihah Pu Tawnluia chuan, Aizawl khawpui thang zelah lirthei a pung a, mumal zawka lirthei tlan dan enkawlna tur leh mihring kea kal te himna turin Pelican Crossing System chu siam a ni a ti. Pu Tawnluia hian Aizawl Smart City in a tum ber chu mitin huap innghahna tlak khawpui siam a ni a ti a, Project 78 hlawmkhawm zinga 33 chu State Sorkar hmalakna, State matching share atana telh a ni a, DPR 27 siam zawh tawh a ni a, Project 10 chu tender tawh a ni a ti.

Aizawl Smart City Project tihhlawhtlinna atan sorkar laipuiin cheng vaibelchhe 128 Mizoram tan a pe chhuak tawh tih Pu Tawnluia hian a sawi a, Covid-19 avanga harsatna thleng mahse, a theih angin hnathawh a ni a ti.

Hawnna Inkhawm hi UD&PA Secretary Dr. C. Vanlalramsanga’n a kaihruai a, Pelican Crossing System bun tura hmalak dan Aizawl Smart City Ltd CEO Pu Lalrothanga’n a sawi a, Mayor Pu PC Lalhmingthanga leh IGP Pu LH Shanliana ten thu an sawi a ni.