AMC-in Durtlang-a fakna leh thuziak intar a tihchhiat chungchang sawi ho

0
382
views

Durtlang leh a chhehvela phalna tel lova fakna leh thuziak intar te, Aizawl Municipal Corporation-in Display of Advertisement and Hoarding Regulation, 2013 tlawh chhana a tihchhiat chungchang chu vawiin khan Aizawl Mayor, Pu PC Lalhmingthanga hovin Durtlang khawthleng YMA Joint Action Committee hruaituten an sawi hova, he thil hi a rang thei ang bera chin fel dan ngaihtuah ni se an ti a ni. Zonet zawhna chhangin Aizawl Mayor, Pu PC Lalhmingthanga chuan, Durtlang khawthleng YMA Joint Action Committee-in an khawthlenga AMC-in thuziak intar a tih chhiate chu tun thla ral hmaa siam that leh an phut thu an sawi chungchang chu inbiakna hian sawi lan a ni lo niin a sawi a, Durtlang khawthlengte harsatna tawh mek chu ching fel tura hmalak an remtih angin, a theih ang anga bawhzui a nih tur thu a sawi. Puan tawh angin, Aizawl Municipal Corporation (AMC) chuan Display of Advertisement and Hoarding Regulation, 2013 tlawh chhanin August ni 28 atang khan AMC huam chhunga phalna tel lova fakna leh thuziak, Hoarding, Banner leh Poster tarte a endik tan a. Hmalak bul tanna atan Ward No. 1 huam chhung, Durtlang leh a chhehvela phalna tel lova thu tarte chu rawng senin ‘X AMC’ tih ziah hnan a ni a, hei hi AMC-ah phalna la tura hriattirna ang a nih thu AMC hotute chuan an sawi a ni. An khawthlenga thuziak intar tihchhiat a nih chungchang hi Durtlang khawthleng YMA Joint Action Committee chuan Pathinni khan an ngaihtuah nghal a. An khawthlenga AMC-in thuziak intar a tih chhiate chu tun thla ral hmaa siam that an phut thu leh an ngenna hi tihhlawhtlin a nih loh chuan a tul anga hmalak zui an tum thu an lo sawi tawh a ni.