AMC in Online hmanga in sak dilna leh phalna a pek chhuah theihna tur Online Building Plan Approval System chu Mayor Pu PC Lalhmingthanga’n vawiin khan a hawng.
Hemi puala inkhawm AMC Auditorium a buatsaih hi AMC Commr. Dr H Lalthlangliana’n a kaihruai a, Mayor chuan, Online Building Plan Approval System chu AMRUT hnuaia hmalakna a nih thu a sawi a, he thil thar hian mipuite tan awlsamna a thlen ngei a beisei thu a sawi. AMC huam chhunga Building sa tur ten AMC-a phalna la tura kal kher ngai lovin OBPAS hmangin dilna an thehlut thei dawn a, dilna lut te chu Online hmang vekin thawktuten an lo buaipui ang a, a hmuna enfiah ngai te an enfiah hnuah leh lehkhapawimawh te tih fel a nih hnuah phalna pek an ni dawn a. An dilna chu pawm a nih leh nih loh sms hmanga hrilh nghal zel an ni dawn bawk. A hma lama phalna lo pek tawh emaw, dilna thehluh tawh tih danglam dilna emaw, Renew ang chi te leh NOC pek ngai te erawhchu dan pangngaiin AMC Office ah buaipui a la ngai dawn thung.
