AMFU-in tun hnaia Mizoram Sorkar-in sawhthing a buaipui thar hluai chu Politcs-a hamthat duhna vang mai nia an ngaih thu an sawi

0
363
views

All Mizoram Farmers’ Union (AMFU)-in tun hnaia Mizoram Sorkar-in sawhthing a buaipui thar hluai chu Politcs-a ham\hat duhna vang mai nia an ngaih thu sawiin, sawhthing hralh dan ngaihtuah tura Agriculture Monitoring and Coordination Committee-a member atana ruat an nihna chu an pawm lo tih an puang. Hemi chungchang hi vawiina Aizawl Venghluia AMFU General Headquarters Pisa-a thuthar lakhawmtute a kawmnaah an pawl General Secretary, Pu Zion Lalremruata’n a puang a, sawhthing hi kum 2016 a\ang khan mumal taka hralh a ni tawh loh thu leh he thilah hian hmalakpui tura \um engemawzat Sorkar an lo ngen tawhnaah chhanna an hmuh ngai loh thu a sawi a. Hetiang a nih laia tunhnaia sorkar-in sawhthing a buaipui thar tak nachhan chu kumin hi Assembly inthlanpui neih kum a nih vang nia an ngaih thu sawiin an pawl chuan ngun taka thil nihphung an zirchian hnuah tun hi sawhthing hralh hun pel tawh a nih bawk avangin Agriculture Monitoring and Coordination Committee-a sorkar-in member atana a ruatna chu pawm chi nia an ngaih loh thu sawiin, an pawm loh thu pawh thuneitute hnenah an thlen tawh tih a sawi. Pu Zion Lalremruata chuan, Mizorama kuthnathawktute harsatna ber chu a hralhna tur Market mumal awm lo a ni a, hetiang harsatna sukiang tura Sorkar laipuiin Agriculture Produce Marketing Control (AMPC) Act a duan chu Mizoramah pawh kum 2008 khan Assembly-in a lo pass tawh chu a enkawltu Department inthlahdah vangin a hlamzuih nia sawiin, hei hi thar thawh leh tura an ngen angin nikum April ni 16-a Chief Minister hova an \hutkhawmnaah Trade and Commerce Secretary chu hemi ni a\anga chhiara thla 2 chhunga AMPC Act atan Rule duang tura tih ni mah se, vawiin thlengin hma ala la lo niin a sawi a. Hetiang a nih avang hian buh leh bara intodelh tura thil pawimawh berte zinga mi ram neih dan phung khuahkhirh tura Land Reform Committee hmalakna pawh a hlamzuih leh mai a hlauhawm nia sawiin, heng thil pahnihte hi kumin August thla ral hma ngeia bawhzui tura Sorkar an phut thu leh an bawhzui lo a nih chuan eng chena thui nge an kal dawn tih an sawilawk thei lo tih a sawi. AMFU General Secretary chuan, tun hnaia Bairabi Zophai hmuna MZP in Zofate chawlhbuk sak a tum \uma Mizoram zirlai leh Journalist-ten Assam Police kut an tuar che \ha lo an tih thu leh he thil thlen laia Police-te che thei lova siamtu Home Minister chu an dem thu a sawi a. Mizoram leh Assam ramri hi a buai lova, Assam hian dik lo takin Mizoram chin a rawn chuh buai tih chu an pawl ngaihdan a nih thu a sawi bawk. Mizoram Sorkar Flagship Programme, NLUP chungchanga sorkar thil tih danah pawh an lungawi loh thu sawiin, Pu Zion Lalremruata chuan, eptu pawl MLA-te thlima Rulling MLA 34 hnenah chauh an bial chhunga NLUP pek tur chungkaw 400 thlang tura hriattir an nih chungchanga an lungawi lohna chu tun thla ni 3 khan Chief Minister hnenah an thlen tawh thu sawiin, heta Chief Minister insawifiahna chu pawm tlak nia an ngaih loh thu a sawi bawk.

Vawiina thuthar lakhawmtute an kawmnaah hian AMFU Vice President, Pu Lalnungliana leh Treasurer, Pu R. Laltluanga pawhin thu an sawi a. Kuthnathawktuten hlawk zawka thlai thar an hralh theih nana hmalak chu an thil tum ber a nih thu leh an tana \ha turah chuan sorkar hmalakna an thlawp zel dawn niin a sawi a. Hetihrual hian an tana \ha lo tur thilah erawh chuan tun hma aia na zawka dodal zel an tum thu a sawi bawk.