Chakma Autonomous District Council inthlannaa thlan tlin member ngah ber MNF chuan CADC-ah Pu Rasik Mohan Chakma kaihhruai sorkar thar an siam thei tih vawiin khan Larsap, Lt. Gen. Nirbhay Sharma an hrilh. Hemi chungchanga an lehkha thehluh hi Governor Private Secretary, Pu Lalngaizuala kutah an hlan a ni. Hemi hnua MNF party thuchhuah tarlan danin CADC-a Pu Rasik Mohan Chakma kaihhruai sorkar din tir tura an ngennaah hian Pu Rasik Mohan Chakma chu MNF Legislature Party Leader atan leh an CEM atan an thlang tih tarlan a ni a, CADC (Constitution and Conduct of Business etc.) Rules, 2002 angin member 20 awmna CADC inthlannaa member 8 nei MNF chu Party mal zinga member ngah ber a nih avangin sorkar siam tura sawm turin Larsap chu an ngen a, Congress leh BJP Member thlantlin thar ten sorkar siam tura harsatna an neih thu te an tarlang bawk. CADC member thlantlin thar Raj Bhavan-a thu thehluttute hi MNF Party Core Committee Member, Pu H. Rammawi, Political Affairs Committee member, Pu R. Vanlalruata leh hruaitu dangten an \awiawm a, Pu H. Rammawi chuan dan angin Larsap chuan member nei tam ber MNF chu sorkar siam turin a sawm tur a ni tih sawiin, an ngenna chu a hlawhtlin a beisei thu a sawi a, CADC-a MNF Legislature Party Leader, RM Chakma pawhin Larsapin sorkar a siam tir a nih chuan a sorkarin member tam zawk rin tawkna a hlawh leh hlawh loh House chhunga fiah a nih hunah fiahna chu a paltlang ngei dawn niin a sawi a ni. Pu Rasik Mohan chuan Mizorama Congress sorkarin CADC-a MNF sorkar siam tir a hlau hle nia sawiin, a hlauhna chhan chu an sorkar laia thil dik lo tih chhui chhuah a nih an hlauh vang em ni tih a zawt a, tun hmaa MNF sorkar lai khan hmasawnna hna nasa takin an thawk tih sawiin, tun \umah hian an sorkar leh chuan hmasawnna hna nasa takin an thawk dawn niin a sawi a ni.
Hetihlai hian Chakma Autonomous District Council-a BJP kaihhruai sorkar in\awm siam tura hmalakna chu thui tak kalpui a ni tawh a, BJP hruaitute hnen a\anga thudawn danin vawiin khan BJP-Congress United Legislature Party hruaitu Pu Santi Jiban Chakma leh a thawhpui tur Executive Member te chu Lawngtlaiah lakluh hman tum a ni a, amaherawhchu, vawiin kha sorkar Pisa chawlh a nih avang leh thil tihfel hmasak ngai \henkhat tihfel hman a nih tak loh avangin hun remchang hmasa berah heng mite hi CADC hruaitu atan rinawmna thu tiam tira lakluh an ni dawn a ni.
